Amit Deshmukh : मुंबई येथे सुरू असलेल्या विधानसभेच्या अधिवेशनात राज्याचे दिवंगत उपमुख्यमंत्री अजित पवार यांच्या अपघाती निधनाचा मुद्दा पुन्हा एकदा गाजला. काँग्रेसचे आमदार अमित देशमुख यांनी सभागृहात हा प्रश्न उपस्थित करत सरकारला जाब विचारला. विधानसभेत अर्थसंकल्पावरील चर्चेदरम्यान बोलताना अमित देशमुख म्हणाले की, अजित पवार यांच्या विमान अपघाताला दीड महिना उलटून गेला असला तरी हा अपघात नेमका कशामुळे झाला आणि त्यांच्या सुरक्षेची जबाबदारी कोणाची होती, याबाबत अद्याप कोणतीही अधिकृत माहिती समोर आलेली नाही. “जर राज्याचे उपमुख्यमंत्रीच सुरक्षित नसतील, तर सर्वसामान्य नागरिकांची सुरक्षा कशी असेल?” असा सवाल त्यांनी उपस्थित केला. दरम्यान, या प्रकरणाची सखोल चौकशी व्हावी आणि आवश्यक असल्यास CBI मार्फत तपास करण्यात यावा, अशी मागणीही करण्यात येत आहे. या संदर्भात रोहित पवार यांनी दिल्लीमध्ये विविध नेते आणि खासदारांच्या भेटी घेऊन या प्रकरणाची चौकशी करण्याची मागणी केली आहे. अमित देशमुख यांनी पुढे सांगितले की, राज्याचा गृह विभाग किंवा शिष्टाचार विभाग यांच्याकडूनही या अपघाताबाबत अद्याप कोणतेही अधिकृत स्पष्टीकरण देण्यात आलेले नाही. तसेच, बारामती विमानतळाचे संचालन करणाऱ्या MIDC आणि MADC या संस्थांकडूनही याबाबत कोणतेही स्पष्ट भाष्य करण्यात आलेले नाही. दरम्यान, राष्ट्रवादी काँग्रेसचे प्रदेशाध्यक्ष शशिकांत शिंदे यांनीही या प्रकरणावर प्रश्न उपस्थित केला. त्यांनी सांगितले की, अजित पवार यांच्या अपघाताबाबत सभागृहात सविस्तर चर्चा होऊ देण्यात येत नाही. स्थगन प्रस्तावालाही परवानगी देण्यात आली नाही, असा आरोप त्यांनी केला. या पार्श्वभूमीवर रोहित पवार यांनी सोशल मीडियावर प्रतिक्रिया देत अमित देशमुख यांनी हा मुद्दा सभागृहात उपस्थित केल्याबद्दल त्यांचे आभार मानले. तसेच या अधिवेशनातच या प्रकरणावर चर्चा होऊन सरकारने ठोस भूमिका मांडावी, अशी अपेक्षाही त्यांनी व्यक्त केली.
