US-Israel-Iran War : गुरुवारी पहाटे इराणने इस्रायल आणि अमेरिकन तळांवर क्षेपणास्त्रांचा नवा मारा केला आहे. हिंदी महासागरात अमेरिकेने इराणची युद्धनौका बुडवल्याच्या रागातून इराणने अमेरिका या कृत्याचा पश्चात्ताप करेल असा इशारा दिला आहे. दरम्यान, इराणच्या एका सर्वोच्च धार्मिक नेत्याने उघडपणे, डोनाल्ड ट्रम्प यांच्या रक्ताची (हत्येची) मागणी केल्याने तणाव कमालीचा वाढला आहे. शनिवारी सुरू झालेल्या या युद्धात आतापर्यंत इराणमध्ये 1200 हून अधिक, लेबनॉनमध्ये ७० आणि इस्रायलमध्ये डझनभर लोकांचा मृत्यू झाला आहे. अमेरिकेने इराणचे सर्वोच्च नेते आयतोल्ला अली खमेनेई यांना ठार केल्यानंतर आणि त्यांच्या अणुकेंद्रांवर हल्ले केल्यानंतर हा संघर्ष अधिक तीव्र झाला आहे. इराणने प्रत्युत्तर म्हणून तेल अवीव आणि जेरुसलेमवर क्षेपणास्त्रे डागली असून इस्रायलनेही तेहरानवर मोठ्या प्रमाणावर हल्ले सुरू केले आहेत. हिंदी महासागरात अमेरिकन पाणबुडीने इराणची ‘आयआरआयएस देना’ ही युद्धनौका टॉर्पेडो मारून बुडवली. यात किमान ८७ इराणी खलाशांचा मृत्यू झाला. इराणचे परराष्ट्र मंत्री अब्बास अरागची यांनी याला समुद्रातील क्रूरता असे म्हटले आहे. विशेष म्हणजे, ही युद्धनौका भारतीय नौदलाने आयोजित केलेल्या सरावात सहभागी होऊन परतत असताना हा हल्ला झाला. या युद्धामुळे जागतिक तेल आणि वायू पुरवठा विस्कळीत झाला असून कच्च्या तेलाच्या किमतीत १५ टक्क्यांनी वाढ झाली आहे. कतार, सौदी अरेबिया आणि कुवेतपर्यंत या युद्धाच्या झळा पोहोचल्या आहेत. अनेक देशांनी आपल्या दूतावासांनजीकच्या भागातून नागरिकांना सुरक्षित स्थळी हलवले आहे. इस्रायलची लेबनॉनवर कारवाई इस्रायली लष्कराने गेल्या २४ तासांत लेबनॉनमधील हिजबुल्लाच्या ८० तळांवर हल्ले केले आहेत. बैरूत आणि त्रिपोलीमधील निर्वासित छावण्यांजवळ झालेल्या या हल्ल्यात अनेक नागरिकांचा मृत्यू झाला आहे. इस्रायलने आपल्या देशातील कामाच्या ठिकाणांवरील निर्बंध शिथिल केले असले तरी शाळा अजूनही बंदच आहेत. या संघर्षामुळे आंतरराष्ट्रीय जहाज वाहतूक ठप्प झाली असून मध्यपूर्वेतील लाखो प्रवासी अडकून पडले आहेत.
