Ambulance Scam – मावळ तालुक्यातील आरोग्यसेवेत रुग्णवाहिकांच्या माध्यमातून मोठ्या प्रमाणात गैरप्रकार सुरू असल्याचा गंभीर आरोप समोर आला आहे. या प्रकरणाची दखल राज्याचे आरोग्यमंत्री प्रकाश आबिटकर यांनी घेतली आहे. स्थानिकांकडून मिळालेल्या तक्रारींनंतर मावळातील रुग्णवाहिका सेवेमधील कथित रॅकेट उघडकीस आले आहे. या प्रकरणामुळे तालुक्यातील आरोग्य व्यवस्थेवर प्रश्नचिन्ह निर्माण झाले आहे. आरोग्यमंत्री प्रकाश आबिटकर यांनी शुक्रवारी कान्हे फाटा येथील उपजिल्हा रुग्णालयाला सदिच्छा भेट देत तेथील कामकाजाची पाहणी केली. या दौऱ्यादरम्यान त्यांनी रुग्णालयातील सुविधा, रुग्णांची स्थिती आणि आरोग्यसेवेची उपलब्धता याबाबत आढावा घेतला. याच वेळी रुग्णवाहिका सेवेतील गंभीर अनियमिततेबाबत मुद्दा त्यांच्या निदर्शनास आणून देण्यात आला. शासनाने सुरू केलेली १०८ क्रमांकावरील आपत्कालीन रुग्णवाहिका सेवा कागदावर सक्षम असली, तरी प्रत्यक्षात मात्र नागरिकांना वेळेवर सेवा मिळत नसल्याच्या तक्रारी सातत्याने येत आहेत. आपत्कालीन परिस्थितीत या क्रमांकावर संपर्क साधल्यास प्रतिसाद मिळत नाही किंवा रुग्णवाहिका उशिरा पोहोचते, याउलट खासगी किंवा विविध संस्थांच्या नावाखाली चालणाऱ्या रुग्णवाहिका मात्र तत्काळ घटनास्थळी पोहोचत असल्याचे समोर आले आहे. आरोग्यमंत्री प्रकाश आबिटकर रुग्ण आणि त्यांच्या नातेवाईकांच्या अडचणींचा गैरफायदा घेत या खासगी रुग्णवाहिका चालकांकडून अवाजवी शुल्क आकारले जाते. अनेक वेळा मोठी रक्कम मागितली जाते, जी सामान्य नागरिकांसाठी मोठा आर्थिक बोजा ठरत असल्याचा प्रकार समोर आला आहे. या प्रकरणामुळे तालुक्यातील आरोग्य व्यवस्थेतील त्रुटी पुन्हा एकदा समोर आल्या आहेत. विशेषतः आपत्कालीन सेवांमध्ये खासगी यंत्रणांच्या वाढत्या हस्तक्षेपामुळे सर्वसामान्य नागरिकांना मोठ्या अडचणींचा सामना करावा लागत आहे. शासनाच्या योजना प्रत्यक्षात प्रभावीपणे राबवल्या जात नसल्याचेही या घटनेतून स्पष्ट होते. आरोग्यमंत्र्यांकडून चौकशीचे आदेश आरोग्यमंत्री प्रकाश आबिटकर यांनी या सर्व प्रकाराची गंभीर दखल घेत तातडीने चौकशीचे आदेश दिले. त्यांनी संबंधित अधिकाऱ्यांना विचारले की, शासनाकडून मंजूर असलेल्या रुग्णवाहिका सुस्थितीत आहेत का, त्या वेळेवर सेवा का देत नाहीत, आणि नागरिकांना १०८ सेवांचा लाभ प्रत्यक्षात मिळतो का, जर या सेवा उपलब्ध नसतील, तर त्यामागील कारणे शोधून काढण्याचे निर्देशही यावेळी त्यांनी दिले.
