नेवासा: समाज हेच आपले कुटुंब मानून सेवा देणारे, नेवासे फाटा येथील ‘शिवमुद्रा’ रुग्णवाहिकेचे चालक विकास निपुंगे यांचा शासकीय औद्योगिक प्रशिक्षण संस्थेतर्फे (ITI) विशेष सन्मान करण्यात आला. संस्थेचे प्राचार्य गणेश हडतगुणे यांच्या हस्ते त्यांना सन्मानित करून त्यांच्या कार्याचे कौतुक करण्यात आले. विकास निपुंगे यांनी आतापर्यंत रस्ते अपघात आणि प्रसूतीसाठीच्या आणीबाणीच्या काळात वेळेवर मदत पोहोचवून सुमारे ५०० हून अधिक जणांचे प्राण वाचविले आहेत. विशेषतः कोरोना काळातील भीषण परिस्थितीत, जेव्हा जवळचे नातेवाईकही मदतीला धजावत नव्हते, तेव्हा निपुंगे यांनी जिवाची पर्वा न करता रुग्णांना रुग्णालयात पोहोचवून खऱ्या ‘देवदूता’ची भूमिका बजावली. ऊन, वारा, पाऊस याची तमा न बाळगता रुग्णसेवेसाठी सदैव तत्पर राहणाऱ्या निपुंगे यांच्या या कार्यामुळे समाजातून त्यांच्यावर अभिनंदनाचा वर्षाव होत आहे. औद्योगिक प्रशिक्षण संस्थेने केलेल्या या सन्मानामुळे समाजसेवेचे व्रत घेणाऱ्या कार्यकर्त्यांचे मनोधैर्य उंचावेल, अशी प्रतिक्रिया परिसरात व्यक्त होत आहे. “कुटुंबाकडे दुर्लक्ष करून समाजालाच कुटुंब मानणाऱ्या समाजसेवकांना जेव्हा चांगल्या संस्थांकडून कौतुकाची थाप मिळते, तेव्हा काम करण्याची मोठी ऊर्जा मिळते,” अशी भावना निपुंगे यांनी सत्कारानंतर व्यक्त केली.
