ठाणे : अंबरनाथ नगरपरिषदेत शिंदेसेना आणि भाजप यांच्यातील महायुतीतून राजकीय राडा उडाला आहे. गेल्या आठवड्यात दोन्ही पक्षांनी सत्ता स्थापनेसाठी विविध डावपेच रचले. भाजपनं शिंदेसेनेला सत्तेतून दूर ठेवण्यासाठी काँग्रेसला सोबत घेतलं, त्यानंतर काँग्रेसने १२ नगरसेवकांना निलंबित केलं. दुसऱ्या दिवशी भाजपने या सर्व नगरसेवकांना आपल्याकडे घेत सत्ता स्थापनेसाठी दावा केला. याच पार्श्वभूमीवर अंबरनाथ नगरपरिषदेत उपनगराध्यक्ष पदासाठी मतदान झाले असून, दोन्ही पक्षांचे नगरसेवक आणि कार्यकर्ते आमनेसामने आले. शिंदेसेना आणि भाजपच्या कार्यकर्त्यांमध्ये जोरदार घोषणाबाजी आणि तणाव पाहायला मिळाला. भाजपच्या महिला कार्यकर्त्यांनी शिंदसेनेच्या कार्यकर्त्यांना “गद्दार” म्हणून हाकलले आणि काहींनी चपला दाखवून जोरदार धक्का दिला. डिसेंबरमध्ये झालेल्या नगरपरिषद निवडणुकीत शिंदेसेने २७, भाजप १४, काँग्रेस १२ आणि राष्ट्रवादी काँग्रेस ४ जागा जिंकल्या होत्या. भाजपच्या तेजश्री करंजुले पाटील यांनी नगराध्यक्ष पदावर विजय मिळवला, मात्र शिंदेसेना सर्वाधिक २७ जागांसह सर्वात मोठा पक्ष ठरला. तरीही बहुमत नसल्यामुळे शिंदेसेना सत्ता स्थापनेसाठी अपयशी राहिली. भाजपच्या प्रदेशाध्यक्ष रविंद्र चव्हाण यांनी शिंदेसेनेला सत्ता मिळवू नये यासाठी डावपेच आखले. उपमुख्यमंत्री एकनाथ शिंदे यांचे खासदारपुत्र श्रीकांत शिंदे यांनी राष्ट्रवादी काँग्रेसच्या ४ नगरसेवकांना भाजपच्या बाजूने वळवून शिंदेसेनेला चेकमेट केले. या सगळ्या घडामोडींमुळे अंबरनाथ नगरपरिषदेत राजकीय तणाव आणि वाद वाढले आहेत, तर उपनगराध्यक्ष निवडणुकीत या संघर्षामुळे अत्यंत चर्चेचा विषय बनले आहे.
