पिरंगुट : मुळशी तालुक्यातील अंबडवेट ग्रामपंचायतीत पाणीटंचाईच्या प्रश्नावरून ग्रामस्थ आक्रमक झाले असून संतप्त नागरिकांनी ग्रामपंचायत कार्यालयालाच टाळे ठोकले. या घटनेमुळे काही काळ तणावाचे वातावरण निर्माण झाले होते. या प्रकरणी सभापती मंदा शेळके व गटविकास अधिकारी सुधीर भागवत यांनी मध्यस्थी करत कार्यालयाचे कुलूप काढले. त्यानंतर ग्रामस्थांची बैठक घेण्यात आली, मात्र या बैठकीतही आरोप-प्रत्यारोपांच्या फैरी झडल्या. अंबडवेट ग्रामपंचायतीत एकूण 9 सदस्य असून त्यापैकी 6 जागा रिक्त आहेत. त्यामुळे गेल्या वर्षभरापासून येथे प्रशासकराज लागू आहे. हेही वाचा : Motor Vehicle tax : जुन्या वाहनांना दुप्पट कर आकारणी; स्क्रॅपिंग पाॅलिसीत नवीन वाहन खरेदीवर करसवलत सध्या ग्रामपंचायत अधिकारी भरत ओमासे व संबंधित विस्तार अधिकारी यांच्या मार्फत कामकाज सुरू आहे. गावठाण भागात वारंवार पाणीटंचाई भासत असल्याने नागरिकांना मोठ्या अडचणींचा सामना करावा लागत आहे. अनेकदा दिवसन्दिवस पाणीपुरवठा खंडित होत असल्याने संताप वाढत असून, ग्रामस्थांनी टाळे ठोकण्याची ही दुसरी वेळ असल्याचे समोर आले आहे. दरम्यान, गटविकास अधिकारी सुधीर भागवत यांच्याशी संपर्क साधण्याचा प्रयत्न केला असता संपर्क होऊ शकला नाही. या प्रसंगी स्वाती ढमाले, सोमा खैरे, नीता नागरे, नितीन ढमाले, देवा नागरे, पोलीस पाटील अशोक नागरे, अमोल शिंदे, दत्ता ढमाले यांसह अनेक ग्रामस्थ उपस्थित होते. आरोप-प्रत्यारोप ग्रामसेवक भरत ओमासे यांच्यावर मोटार दुरुस्ती व पाइपलाइन दुरुस्तीमध्ये दिरंगाई केल्याचा आरोप ग्रामस्थांनी केला. यावर प्रतिक्रिया देताना ओमासे यांनी तांत्रिक अडचणींमुळे कामात विलंब होत असल्याचे सांगितले. तसेच जलजीवन मिशन योजनेअंतर्गत चुकीच्या ठिकाणी पाइपलाइन टाकल्याचा आरोपही ग्रामस्थांनी केला असून याबाबत संबंधित अधिकार्यांना बोलावून सविस्तर चौकशी करण्याचा निर्णय बैठकीत घेण्यात आला. पाणीटंचाई गंभीर विषय असल्याने एखाद्या दिवशी तांत्रिक अडचणींमुळे पाणीपुरवठा खंडित झाल्यास तत्काळ टँकरची व्यवस्था करावी, अशी मागणीही यावेळी करण्यात आली. हेही वाचा : Pune District : नागरिकांची गैरसोय, प्रशासनाचा भोंगळ कारभार; कोळवण-वाळेन मार्गावरील पूल पाडल्याने वाळेन व डोंगरगाव ग्रामस्थांची दैना
