पुणे : भारतीय जनता पक्षाचे प्रभाग क्रमांक २७ मधील उमेदवार महेश (ऊर्फ) अमर आवळे यांनी बुधवारी पर्वती गाव आणि मित्रमंडळ कॉलनी येथील स्थानिक नागरिकाच्या घरी जाऊन भेटीगाठी घेतल्या. मित्रमंडळ कॉलनीत भेटीगाठी घेताना आवळे यांनी आपल्या मित्राच्या रिक्षातून प्रवास केला. या वेळी त्यांनी थोडा वेळ स्वतःच रिक्षा चालवली. आपल्याला सर्व प्रकारची कामे आली पाहिजेत, असे आवळे कायम कार्यकर्त्यांना सांगत असतात. त्याचीच प्रचिती आल्याचे मित्रांनी सांगितले. या वेळी घरातील ज्येष्ठांचे आशीर्वाद घेऊन त्यांनी भाजपच्या संपूर्ण पॅनेलला मतदान करण्याची विनंती केली. एका सामान्य कुटुंबातील तरुण उमेदवार म्हणून आपल्यापुढे मत मागण्यासाठी आल्याचे पाहून या भागातील ज्येष्ठ नागरिकांनी आनंद व्यक्त केला. या वेळी ज्येष्ठ नागरिकांनी विचारलेल्या विविध नागरी प्रश्नांची त्यांनी समाधानकारक उत्तरे दिली. काही कुटुंबांमध्ये लहानग्यानीही आवळे यांचे स्वागत केले. अमर आवळे यांनी बुधवारी सकाळी पर्वती गाव आणि मित्रमंडळ कॉलनी या भागात भेटीगाठी घेतल्या आणि संध्याकाळी नवी पेठ भागात पदयात्रेमध्ये ते सहभागी झाले. या वेळी तरुणांच्या हातात अमर आवळे यांचे छायाचित्र असलेले पोस्टर्स होते. नवी पेठेत काढलेल्या पदयात्रेमध्ये महिलांचा सहभाग मोठा होता.
