पिंपरी, (प्रतिनिधी) – पेट्रोल-डीझेल यासारख्या पारंपरिक इंधनामुळे निर्माण होणाऱ्या प्रदूषणाने मानवी आरोग्य धोक्यात येत आहे. यामुळे नैसर्गिक इंधनावर कसे वाहने धावतील यासाठी तंत्रज्ञान विकसित करीत आहोत. भविष्यात सर्व वाहने ग्रीन एनर्जीवर धावतील. हे संशोधनाचे कार्य युद्धपातळीवर सुरू आहे, अशी माहिती केपीआयटी टेक्नॉलॉजीस कंपनीचे अध्यक्ष रवी पंडीत यांनी दिली.

डॉ डी वाय पाटील प्रतिष्ठान आकुर्डी संचलित इन्स्टिट्यूट फॉर कंप्युटींग ॲंड सॉफ्टवेअर डेव्हलपमेंटच्या वतीने रौप्य महोत्सवी वर्षानिमित्त आयोजित कार्यक्रमात ते बोलत होते.

यावेळी प्रोकोजिया कंपनीचे संचालक श्यामकांत डुंबरे, आयएसीएसडीचे कार्यकारी संचालक डॉ भरत चव्हाण पाटील, व्यवस्थापकीय संचालिका सुप्रिया चव्हाण पाटील, डीवायपीईआरएफचे संचालक डॉ जे.जी पाटील, सल्लागार प्रा डी.आर करनुरे, व्यवस्थापकीय संचालक( गुणवत्ता) श्वेता चव्हाण पाटील, डीवायपीआयएमएसचे संचालक डॉ.कुलदीप चरक आदी मान्यवर उपस्थित होते.

यावेळी संगणक तज्ञ डॉ विजय भटकर यांनी व्हिडिओ कॉन्फरन्सद्वारे संवाद साधला. डॉ भटकर म्हणाले कि, सॉफ्टवेअर विकसित करण्याचे शिक्षण देवून विद्यार्थ्यांना घडविण्यामध्ये या संस्‍थेचे मोठे योगदान आहे.

यावेळी ट्रेसलिंक आयएनसी कंपनीला (व्यवसायिक कार्यक्षमता पुरस्कार), अकॉप्स सिस्टीमला( सायबर सुरक्षा), निटॉर इन्फोटेकला ( एचआर पुरस्कार), टेकस्पियनला ( उदयोन्मुख कंपनी पुरस्कार), क्रेडेंसा सोल्युशन्स ( डेटा ॲनालिसीस पुरस्कार), एक्सुसिया कंपनीला आयटी लीडरशिप पुरस्कार प्रदान करण्यात आले.

यावेळी घेण्यात आलेल्या तांत्रिक चर्चासत्रात मंद्रीसॉफ्ट कंपनीचे मुख्य कार्यकारी अधिकारी जय किंकर, नेट एसपीआयचे जितेंद्र पाटील यांनी आपले अनुभव यावेळी सांगितले. सूत्रसंचालन अनिरुध्द पाठक यांनी तर आभार केशव कुमार यांनी मानले.