बॉलीवुड अभिनेत्री आलिया भट्टने यंदाच्या कान्स फिल्म फेस्टिव्हलमध्ये पदार्पण केले. ऑफ-शोल्डर बस्टियर गाउन आणि समारोपावेळी क्रिस्टलने नक्षीकाम केलेली साडी यामुळे तिच्या लूकने सर्वांचे लक्ष वेधले. आलियाचे कान्समधील पदार्पण यशस्वी ठरले असून, तिचा हा लूक पुढील कान्सपर्यंत प्रेक्षकांच्या स्मरणात राहील. याचदरम्यान, आलियाचा एक व्हिडिओ सोशल मीडियावर व्हायरल झाला, ज्यामध्ये तिने ऐश्वर्या राय बच्चन यांची मनापासून स्तुती केली आहे.

फ्रेंच रिव्हेरामधील या व्हिडिओत आलिया तिच्या कान्समधील अनुभवाबद्दल बोलते. ब्रूटशी बोलताना ती म्हणाली, “सध्या सगळे मोबाइलवर रेड कार्पेट लूक पाहत आहेत. मी ऐश्वर्या राय बच्चन यांना त्यांच्या शानदार अंदाजात रेड कार्पेटवर चालताना आणि जागतिक व्यासपीठावर भारताचे प्रतिनिधित्व करताना पाहत मोठी झाले. हा माझ्यासाठी नेहमीच प्रेरणादायी अनुभव होता. येथे असणे खूप छान वाटते, जणू काही क्षण पाहून मी थक्क झाले.”

या व्हिडिओनंतर चाहत्यांनी आलियाचे कौतुक केले. एका सोशल मीडिया युजरने लिहिले, “आलिया नेहमीच इतर अभिनेत्रींचे कौतुक करते आणि त्यांचे नाव घेते. ही तिची सवय कौतुकास्पद आहे.” दुसऱ्या युजरने म्हटले, “आलिया इतर अभिनेत्रींबद्दल नेहमी चांगले बोलते, ही गोष्ट मला खूप आवडते.”

आलिया अलीकडेच ‘जिगरा’ चित्रपटात दिसली, जो बॉक्स ऑफिसवर फारसा यशस्वी ठरला नाही. ती लवकरच ‘अल्फा’ आणि संजय लीला भन्साळी यांच्या ‘लव्ह अँड वॉर’ या चित्रपटात मुख्य भूमिकेत दिसणार आहे.