प्रभात वृत्तसेवा आळंदी – आळंदी नगरपरिषद निवडणुकीत प्रभाग क्र. 3 ब मधून राष्ट्रवादी काँग्रेस पक्षाचे उमेदवार योगेंद्र गोपाळ कुर्हाडे (आबा) हे ’घड्याळ’ चिन्हावर निवडणूक लढवत आहेत. कुर्हाडे यांचे कुटुंबीय अनेक वर्षे नगराध्यक्ष आणि नगरसेवक म्हणून कार्यरत असल्यामुळे त्यांना स्थानिक प्रशासकीय कामांचा मोठा अनुभव आहे. या अनुभवाच्या बळावर ते प्रभागाचा चेहरामोहरा बदलण्यास सज्ज आहेत. कुर्हाडे कुटुंबीय आणि योगेंद्र कुर्हाडे यांच्या प्रयत्नांमुळे प्रभागात अनेक मोठी कामे मार्गी लागली आहेत. आळंदीसाठी भामा-आसखेड पाणी योजनेसाठी त्यांनी सातत्याने पाठपुरावा केला. अनेक वर्षांपासून रखडलेल्या एसटीपी प्लॅन्टच्या कामातील अडथळे दूर करून ते सुरू करण्यासाठी मार्ग मोकळा केला. शहरातील काँक्रिट रस्त्यांसाठी सातत्याने निधी मिळवला. मरकळ रोड ते वडगाव या महत्त्वाच्या 12 मीटर रुंदीच्या डीपी रस्त्याच्या कामासाठीही पाठपुरावा केला आहे. यांसह अनेक महत्वाची कामे करून त्यांनी आळंदीच्या विकासात भर घातली आहे.राज्यात आणि केंद्रात महायुतीचे सरकार असल्यामुळे निधीची कोणतीही अडचण येणार नाही, असा विश्वास त्यांनी व्यक्त केला आहे. कामांचा मोठा अनुभव आणि विकासाची स्पष्ट दृष्टी असलेले योगेंद्र कुर्हाडे प्रभाग क्र. 3 ब ला विकासाच्या नव्या उंचीवर नेतील, अशी भावना प्रभागातील नागरिक बोलून दाखवत आहेत. योगेंद्र कुर्हाडे यांच्या प्रचाराला नागरिकांचा उत्स्फूर्त प्रतिसाद मिळत आहे. दरम्यान, प्रभाग 3 अ मधील उमेदवार आशा आशिष गोगावले यांनीदेखील प्रचारात आघाडी घेतली असून त्यांच्याही कुटुंबात मोठा प्रशासकीय अनुभव आहे. या दोन्ही उमेदवारांच्या कुटुंबातील प्रशासकीय अनुभव पाहता त्याचा प्रभागातील नागरिकांना मोठा फायदा होण्याची शक्यता व्यक्त होत आहे. भविष्याचा आश्वासक जाहीरनामा योगेंद्र कुर्हाडे यांनी आगामी काळात प्रभागातील मूलभूत समस्या सोडवण्यासाठी स्पष्ट व्हिजन जाहीर केले आहे. प्रभागात दररोज नियमित पाणीपुरवठा करणे आणि कचरा व्यवस्थापन प्रभावीपणे राबवणे. सर्व गल्ल्यांमध्ये भूमिगत वीजवाहिन्या टाकणे. प्रत्येक गल्लीसाठी प्रवेशद्वार उभारून त्यावर घरमालकांचे नाव व क्रमांक टाकून शिस्त आणणे. महिला सक्षमीकरणासाठी कार्यशाळा, प्रशिक्षण वर्ग भरवणे. विद्यार्थ्यांसाठी शाळा क्र. 4 च्या टेरेसवर ओपन लायब्ररी, ज्येष्ठ नागरिकांसाठी विरंगुळा केंद्र आणि बालकांसाठी उद्याने उभारणे, ही प्रमुख कामे ते करण्यास उत्सुक आहेत.
