Pune Mahanagarpalika Election 2026 | महापालिका निवडणुकींसाठी अनेक पक्षांकडून उमेदवार यादी जाहीर न करता उमेदवारांना परस्पर एबी फॉर्म दिले जात आहेत. यातच आज शेवटच्या दिवशी अनेक मोठ्या नावांना उमेदवारी देण्यात आली आहे. राष्ट्रवादी काँग्रेस अजित पवार गटाकडून गुंड गजा मारणेच्या पत्नीला उमेदवारी जाहीर करण्यात आली आहे. राष्ट्रवादी काँग्रेस अजित पवार गटाने पुण्यातील प्रभाग १० बावधनमधून जयश्री मारणे यांनी उमेदवारी जाहीर करत एबी फॉर्म दिले आहे. त्यानुसार जयश्री मारणे यांनी उमेदवारी अर्ज भरला आहे. पुण्यातील गुन्हेगारी थांबवा, असे म्हणणाऱ्या अजित पवारांच्या पक्षानेच गुंड गजा मारणेच्या पत्नीला उमेदवारी जाहीर केल्याने राजकीय वर्तुळात अनेक चर्चांना उधाण आले आहे. रुपाली ठोंबरे पाटलांना देखील उमेदवारी जाहीर तर गेल्या काही दिवसांपासून राज्यातील राजकारणात चर्चेत असणाऱ्या रुपाली ठोंबरे पाटलांना देखील अजित पवार यांच्या राष्ट्रवादी काँग्रेसकडून उमेदवारी जाहीर करण्यात आली आहे. त्यांना राष्ट्रवादी काँग्रेस अजित पवार गटाने एबी फॉर्मचे वाटप केले आहे. प्रभाग क्रमांक २६ मधून अधिकृत उमेदवारी देण्यात आली आहे. मानकरांची दोन्ही मुलं निवडणुकीच्या रिंगणात राष्ट्रवादी काँग्रेस अजित पवारांच्या पक्षाचे नेते दीपक मानकर यांची दोन्ही मुलं निवडणुकीच्या रिंगणात उतरली आहेत. एकाला भाजपने तर दुसऱ्याला राष्ट्रवादीकडून उमेदवारी जाहीर झाली आहे. बापू मानकर भाजपकडून तर हर्षवर्धन मानकर राष्ट्रवादीकडून उमेदवारी मिळाली आहे. Pune Mahanagarpalika Election 2026 | दरम्यान, राज्यातील २९ महापालिका निवडणुकांसाठी १५ जानेवारी रोजी मतदान प्रक्रिया पार पडणार असून १६ जानेवारी रोजी निकाल जाहीर करण्यात येणार असल्याची माहिती राज्य निवडणूक आयोगाकडून देण्यात आली आहे. महत्त्वाचे म्हणजे आज (३० डिसेंबर) उमेदवारी अर्ज दाखल करण्याचा शेवटचा दिवस आहे. त्यात हा वेळ सकाळी ११ ते दुपारी ३ वाजेपर्यंतच असल्याने उमेदवारांची एकच धावपळ सुरू झाली आहे. हेही वाचा : उमेदवारांसाठी ‘एबी फॉर्म’ महत्त्वाचा का? त्याकरिता इतकी धडपड का केली जाते?
