नाशिक : विधानसभेचे विरोधी पक्षनेते अजित पवार यांनी तात्काळ विरोधी पक्षनेते पदाचा राजीनामा द्यावा, अशी मागणी भाजप आध्यात्मिक आघाडीचे प्रमुख आचार्य तुषार भोसले यांनी केली आहे. अजित पवार यांनी छत्रपती संभाजी महाराज यांच्याबाबत केलेल्या विधानावर भाजप आध्यात्मिक आघाडीने आक्षेप घेतला आहे.

धर्मवीर छत्रपती संभाजी महाराज हे हिंदू समाजाचे स्वाभिमान, अस्मिता आहेत. अजित पवार म्हणतात की, ‘छत्रपती संभाजीराजे हे धर्मवीर नव्हते…’ त्यांनी जनतेच्या भावना दुखावल्या आहेत. त्यांनी तात्काळ विधानसभा विरोधी पक्षनेतेपदाचा राजीनामा द्यावा, अशी मागणी तुषार भोसले यांनी केली आहे. अजित पवार यांनी छत्रपती संभाजीराजे यांचा अपमान केल्यामुळे या पदावर राहण्याचा नैतिक अधिकार अजित पवार यांना नाही, त्यांनी राजीनामा द्यावा, अशी मागणी त्यांनी केली आहे.

छत्रपती संभाजीराजे यांच्याबाबत असं बोलण्याचा अधिकार अजित पवार यांना कुणी दिला? अजित पवार यांनी तातडीने माफी मागावी अन्यथा राजीनामा द्यावा, असं ते म्हणाले.

‘धर्मवीर’ छत्रपति संभाजी महाराज ❗️🚩🚩🚩

आम्हां हिंदूंसाठी शंभूराजे सदैव धर्मवीरच ‼️

समस्त हिंदू समाजभावनेचा अपमान करणाऱ्या @AjitPawarSpeaks यांचा धिक्कार !

— Acharya Tushar Bhosale (@AcharyaBhosale) December 30, 2022

अजित पवार यांचे 14 मे 2019 चे ट्विट भोसले यांनी दाखवले. अजित पवार 2019 पर्यंत संभाजी महाराज यांना धर्मवीर मानायला तयार होते. मात्र आता 2022 मध्ये कशी त्यांना उपरती आली ?, असा सवाल त्यांनी केला आहे.

माजी मुख्यमंत्री उद्धव ठाकरे आणि आदित्य ठाकरे यांनाही प्रश्न विचारायचा आहे की, उद्धव ठाकरे आणि आदित्य ठाकरे आपली भूमिका बदलणार का? ते अजित पवार यांचा निषेध करणार का? संजय राऊत यांची दातखीळ बसली आहे का? छत्रपती संभाजी महाराज यांनी धर्मासाठी बलिदान दिले. त्यांच्याबद्दल असं बोलून अजित पवार यांनी विरोधी पक्षनेते पदाला डाग लावलाय, असं म्हणत तुषार भोसले यांनी अजित पवार यांच्यावर टीका केली आहे