पुणे : महापालिका निवडणुकांच्या पार्श्वभूमीवर राज्यातील राजकीय वातावरण तापले असून, विविध शक्यता आणि चर्चांना उधाण आले आहे. पुणे आणि पिंपरी-चिंचवड महापालिकेत दोन्ही राष्ट्रवादी काँग्रेस पक्ष एकत्र निवडणूक लढवत असल्याने, निवडणुकांनंतर दोन्ही राष्ट्रवादी पुन्हा एकत्र येणार का, यावर राजकीय वर्तुळात चर्चा रंगल्या आहेत. याच पार्श्वभूमीवर राष्ट्रवादी काँग्रेस (शरदचंद्र पवार गट) नेत्या सुप्रिया सुळे केंद्रात मंत्री होणार असल्याच्या चर्चाही सुरू झाल्या आहेत. या चर्चांवर उपमुख्यमंत्री अजित पवार यांनी प्रतिक्रिया दिली असली तरी, सुप्रिया सुळे यांच्या मंत्रिपदाबाबत थेट भाष्य करण्याचे त्यांनी टाळले. ते ‘मुंबई तक’ला दिलेल्या मुलाखतीत बोलत होते. ‘मीडियातूनच अशा बातम्या ऐकल्या’ सुप्रिया सुळे केंद्रात मंत्री होणार आणि त्यानिमित्ताने दोन्ही राष्ट्रवादी एकत्र येणार, या प्रश्नावर बोलताना अजित पवार म्हणाले, “मी मीडियातूनच अशा सगळ्या बातम्या ऐकल्या आहेत.” त्यांनी यावेळी राज ठाकरे आणि उद्धव ठाकरे यांच्या उदाहरणाचा उल्लेख करत, “ते दोघे एकत्र निवडणूक लढवत असले तरी त्यांचे पक्ष वेगवेगळेच आहेत. त्यांनी फक्त जागावाटप केले आहे. त्यांच्या मनात काय आहे, हा त्यांचा अंतर्गत प्रश्न आहे, कारण ते पक्षप्रमुख आहेत,” असे सूचक भाष्य केले. ‘स्थानिक पातळीवर कार्यकर्त्यांचे विचार जुळले’ दोन्ही राष्ट्रवादी एकत्र कशा आल्या, यावर बोलताना अजित पवार म्हणाले, “आमच्या काही खालच्या स्तरावरील कार्यकर्त्यांचे विचार जुळले आणि आपण एकत्र लढावे, अशी भूमिका त्यांनी मांडली. वाद नको म्हणून आम्ही त्याला ग्रीन सिग्नल दिला.” स्थानिक स्वराज्य संस्थांच्या निवडणुकांमध्ये अशा प्रकारचे निर्णय स्थानिक परिस्थितीनुसार घेतले जातात, असेही त्यांनी स्पष्ट केले. ‘एक-एक स्टेप असा प्रकार नाही’ युतीबाबत पुढे आणखी पावले टाकली जातील का, या प्रश्नावर अजित पवार म्हणाले, “एक-एक स्टेप असा काही प्रकार नाही. स्थानिक स्वराज्य संस्थांच्या निवडणुकांमध्ये स्थानिक राजकारण पाहून निर्णय घेतले जातात. २०२९ च्या निवडणुकांसाठी आतापासून अंदाज बांधण्याची गरज नाही.” सध्या महायुतीत भाजप, शिवसेना (शिंदे गट) आणि राष्ट्रवादी काँग्रेस एकत्र काम करत असून, त्याच पद्धतीने पुढे वाटचाल सुरू राहील, असेही त्यांनी स्पष्ट केले. एकूणच, सुप्रिया सुळे यांच्या केंद्रातील मंत्रिपदाच्या चर्चांवर अजित पवारांनी थेट उत्तर देणे टाळले असले तरी, स्थानिक पातळीवरील राजकीय गणितांमुळेच महापालिका निवडणुकांत दोन्ही राष्ट्रवादी एकत्र आल्याचे संकेत त्यांनी दिले.
