बारामती – उपमुख्यमंत्री झाल्यानंतर अजित पवार पहिल्यांदाच शनिवारी (ता. 26) रोजी बारामतीत येत आहेत. उपमुख्यमंत्री झाल्याबद्दल बारामतीकरांच्या वतीने अजित पवार यांचा शारदा प्रांगण येथे सायंकाळी सात वाजता नागरी सत्कार करण्यात येणार आहे. तसेच भव्य मिरवणुकीचे आयोजन करण्यात आले असल्याची माहिती शहराध्यक्ष जय पाटील व बारामती सहकारी बँकेचे चेअरमन सचिन सातव यांनी दिली.

राष्ट्रवादी मधील फुटीनंतर अजित पवार पहिल्यांदाच बारामतीत येत आहेत. अजित पवार यांनी भाजपसोबत जाण्याची भूमिका घेतली व एकनाथ शिंदे व देवेंद्र फडणवीस यांच्या मंत्रिमंडळात ते उपमुख्यमंत्री व अर्थमंत्री म्हणून सहभागी झाले. या नाट्यमय घडामोडीनंतर अजित पवार हे प्रथमच बारामती येत आहेत. त्यांचा नागरी सत्कार होत असल्यामुळे या नागरी सत्काराला उत्तर देताना अजित पवार आपल्या मतदारांपुढे नेमकी काय भूमिका मांडतात, याबाबत कमालीची उत्सुकता आहे.

एरवी दर शनिवारी बारामतीत विविध विकास कामांच्या पाहणी निमित्त येणाऱ्या अजित पवारांनी गेले अडीच महिने राजकीय घडामोडींच्या पार्श्वभूमीवर बारामतीला येणे कमी केले होते. त्यामुळे आता प्रदीर्घ कालावधीनंतर अजित पवार बारामतीत येत असल्यामुळे त्यांच्य सत्कारासाठी कार्यकर्त्यांनी आतापासूनच तयारी केली आहे. बारामती येथील कारभारी सर्कल पासून अजित पवार यांची भव्य मिरवणूक काढण्यात येणार असून नंतर शारदा प्रांगणात संध्याकाळी त्यांचा नागरिक सत्कार केला जाणार आहे.