प्रभात वृत्तसेवा भोर – आम्हाला पदे पुणे जिल्ह्यामुळे मिळालेली आहेत. यामुळे याची जाणीव राखत आम्हाला या जिल्ह्यात कामे केली पाहिजेत, असे आश्वासन उपमुख्यमंत्री अजित पवार यांनी दिले. भोर येथे नगरपरिषद निवडणुकीतील प्रचारार्थ आयोजित राष्ट्रवादी काॅंग्रेसच्या जाहीर सभेत पवार बोलत होते. उपमुख्यमंत्री अजित पवार पुढे म्हणाले की, पुणे जिल्ह्यातील सर्व तालुक्यांमध्ये आम्ही मोठ्या प्रमाणावर विकासकामे केली. त्यामुळे आम्हाला जनतेच्या पाठिंब्यामुळे राज्यातील सत्तेत महत्त्वाची पदे मिळाली. त्याची परतफेड म्हणून आम्हाला मोठ्या प्रमाणावर विकासकामे करण्याची संधी द्या. आम्ही बारामती नगरपालिका, पिंपरी चिंचवड नगरपालिकेचा कायापालट केलेला आहे. तशी विकासकामे करू, अशी ग्वाहीही पवार यांनी यावेळी दिली. एमआयडीसी हा भोरसाठी जिव्हाळ्याचा विषय आहे. परंतु काही लोकांना एमआयडीसी नको, असा टोला कुणाचेही नाव न घेता विरोधकांना लगावला.राष्ट्रवादी पक्षाचे सर्व अधिकृत उमेदवार व मोठ्या संख्येने कार्यकर्ते उपस्थित होते.
