पुणे : महाविद्यालयीन विद्यार्थ्यांमधील नाविन्यपूर्ण संकल्पनांना वाव देण्यासाठी आणि त्यांच्यातील उद्यमशीलतेला पाठबळ देण्याच्या उद्देशाने इनोव्हेशन फाउंडेशनच्या वतीने ‘इनोव्हेट यू टेकॅथॉन ३.०’ या राष्ट्रीय स्तरावरील हॅकेथॉनचे आयोजन करण्यात आले आहे. ही स्पर्धा २१ आणि २२ फेब्रुवारी २०२६ रोजी ‘एआयएसएसएमएस’ इन्स्टिट्यूट ऑफ इन्फॉर्मेशन टेक्नॉलॉजी (आयओआयटी) महाविद्यालयात पार पडणार असल्याची माहिती फाउंडेशनचे अध्यक्ष कल्पेश यादव यांनी पत्रकार परिषदेत दिली. या हॅकेथॉनचे हे तिसरे वर्ष असून, यंदा सामाजिक समस्यांवर तंत्रज्ञानाच्या सहाय्याने प्रभावी उपाय शोधण्यावर विशेष भर दिला जाणार आहे. यामध्ये प्रामुख्याने कृत्रिम बुद्धिमत्ता (एआय) तंत्रज्ञानाचा कल्पक वापर करणाऱ्या प्रकल्पांना विशेष प्रोत्साहन दिले जाईल. तसेच, सर्वाधिक नाविन्यपूर्ण प्रकल्पासाठी ‘इनोव्हेशन अवॉर्ड’ आणि लाखो रुपयांची रोख पारितोषिके प्रदान करण्यात येणार आहेत. एड्युटेक, पर्यावरण, आरोग्यसेवा, ट्रॅफिक मॅनेजमेंट, आपत्ती व्यवस्थापन आणि ॲग्रिटेक अशा विविध विषयांवरील समस्या आव्हाने म्हणून विद्यार्थ्यांसमोर ठेवल्या जातील. या राष्ट्रीय स्तरावरील स्पर्धेला सावित्रीबाई फुले पुणे विद्यापीठ, एआयसीटीई, एमआयडीसी आणि सीओईपी तंत्रशास्त्र विद्यापीठासह अनेक शासकीय व शैक्षणिक संस्थांचा सहकार्य लाभला आहे. इंजिनीअरिंग, पॉलिटेक्निक, बीसीए, एमसीए आणि बी-टेक ॲग्री अभ्यासक्रमांचे विद्यार्थी ३ ते ४ जणांच्या गटाने यात सहभागी होऊ शकतात. केवळ स्पर्धाच नव्हे, तर विजयी प्रकल्पांना प्रत्यक्षात आणण्यासाठी फाउंडेशनकडून मेंटरिंग, बूटकॅम्प आणि स्टार्टअप एक्स्पोच्या माध्यमातून मार्गदर्शनही दिले जाणार आहे. इच्छुक विद्यार्थ्यांनी ५ फेब्रुवारी २०२६ पर्यंत innovateyou.in या संकेतस्थळावर आपली नोंदणी पूर्ण करणे आवश्यक आहे. सहभागी स्पर्धकांसाठी राहण्याची व जेवणाची उत्तम सोय करण्यात आली असून, नोंदणीसाठी काही अडचण असल्यास संकेतस्थळावरील क्रमांकावर संपर्क साधण्याचे आवाहन करण्यात आले आहे. जास्तीत जास्त विद्यार्थ्यांनी या संधीचा लाभ घ्यावा, असे आवाहन कल्पेश यादव यांनी यावेळी केले.
