वातावरणामुळे नागरिक आजारी

नारायणडोह – गेल्या आठवड्यात नगर तालुक्यात अवकाळी पावसाने जोरदार हजेरी लावली. गारपिटीसह झालेल्या पावसाने नारायणडोहो परिसरात पिकांची अपरित हानी झाली. यातून शेतकरी सावरत असताना दररोज सकाळी पडणाऱ्या धुक्याने संपूर्ण शेती व शेतातील पिकांवर रोगांचे प्रमाण वाढल्याने शेतकऱ्यांना र्औषध फवारणी खर्चाचा भुर्दंड सोसावा लागत आहे.

एकीकडे शेतकरी अडचणीत सापडला आहे तर दुसरीकडे नागरिक या विषम वातावरणामुळे आजारी पडण्याचे प्रमाण वाढले आहे. नारायणडोहो, उक्कडगाव, मांडवा, सांडवा, टाकळी काझी, सारोळा बध्दी, दरेवाडी, तुक्कडडोढा, वाळुंज, निंबोडी आदी परिसरात नुकत्याच झालेल्या गारपिटीच्या पावसाने शेतीची अपरिणीत हानी झाली आहे. त्यातच सध्या दररोज पहाटेपासून सकाळी ७ वाजेपर्यंत पडत असलेले धुके व दवबिंदूने शेतातील उरली, सुरलेली पिकेही धोक्यात आली आहेत.

सध्या शेतात असलेली कांदा, गहू, हरबरा, ज्वारी ही पिके व डाळींब, इतर फळबागा जगविण्यासाठी खर्चिक असलेल्या रासायनिक औषधांचा वापर मोठ्या प्रमाणावर वाढला आहे. गारपिटीचा पाऊस व आता पडत असलेल्या धुक्यामुळे पिकांचे मोठे नुकसान होत आहे. राज्य शासनाने शेतकऱ्यांना नुकसान भरपाई देण्याचे जाहीर केले, परंतु त्यासाठी ऑनलाईन फॉर्म भरणे, तलाठी व मंडळ अधिकारी यांना पंचनामे इतर कागदपत्रे सादर करणे, अशा किचकट प्रक्रियाने ‘भीक नको, पण कुत्रं’ आवर अशी म्हणण्याची वेळ शेतकऱ्यांवर आली आहे.

मागील वर्षीच्या पावसाने झालेली नुकसान भरपाई अद्यापपर्यंत शेतकऱ्यांना मिळालेली नसताना आता तरी मिळेल का ? असा प्रश्न शेतकऱ्यांमधून विचारला जात आहे. सध्या पडत असलेल्या धुक्याने पहाटेचे अपघात वाढण्याचा धोका निर्माण झाला आहे. या धुके व दवबिंदूमुळे हवेत गारठा निर्माण होऊन नागरिक आजारी पडण्याचे प्रमाण वाढले आहे.