शेवगाव – तालुक्यातील कृषी सेवा केंद्र चालकांना खतासोबत लिंकिंग मटेरियल घ्यावे लागत असल्याने त्रस्त केंद्र चालकांनी जोपर्यंत अशा लिकिंग मटेरियलची सक्ती थांबत नाही, तोपर्यंत आज (दि.३ ) पासून दुकाने बंद ठेवण्याचा निर्णय घेतला आहे. लिंकिंगची सक्ती त्वरित उठविण्याची मागणी शेवगाव तालुका रासायनिक खत विक्रेते संघटनेने जिल्हाधिकाऱ्याकडे केली आहे. तहसीलदार प्रशांत सांगडे, कृषी अधिकारी राहुल यांनाही निवेदन देण्यात आले आहे . शेवगाव तालुक्यात एकूण १७० नोंदणीकृत कृषी सेवा दुकानदार आहेत. या सर्व दुकानदारांना कंपनीने सक्तीने दिलेले लिंकिंग मटेरियल धूळखात पडून आहे. तालुक्यातील प्रत्येक दुकानदाराकडे किमान दोन ते तीन लाखाचे तर सर्वांकडे मिळून एकूण किमान दोन कोटीपेक्षा जास्त किंमतीचे लिंकिंग मटेरियल पडून आहे. याबाबत दुकानदारांनी कंपनीकडे तक्रार केली असता आम्ही खताबरोबर लिंकिंग मटेरियल देत नसल्याचा ते कांगावा करतात . तीन महिन्यांपूर्वी जिल्हाधिकारी यांच्यासमवेत सर्व कंपनीच्या प्रतिनिधीसह झालेल्या बैठकीत लिंकिंग करून नये, असे स्पष्टपणे सांगण्यात येऊन सुद्धा कंपन्यांनी व होलसेलर यांनी त्याकडे जाणीवपूर्वक दुर्लक्ष करून लिंकिंग सुरु केले आहे. कृषी सेवा केंद्र चालक तथा किरकोळ दुकानदार व शेतकरी वर्गात या लिकिंगवरून मोठे वाद होतात. या वादात अनेकदा विविध संघटनाही उतरतात. शेतकऱ्यांशी असलेल्या नेहमीच्या संबंधामुळे असे वाद परवडणारे नसतात. कंपन्या व होलसेल विक्रेते मात्र नको असलेल्या उत्पादनासोबत सक्तीने लिंकिंग करतात. हे लिंकिग बंद व्हावे, शासनाने त्यासाठी ठोस निर्णय घ्यावा. तसेच आम्हाला मुबलक व विना लिंकिंग मालाचा पुरवठा करावा, अशी विनंती निवेदनात करण्यात आली आहे. तसे न झाल्यास शेवगाव तालुका रासायनिक खते व्यापारी संघटनेच्या वतीने जोपर्यंत रासायनिक खतासोबत लिंकिंग बंद होत नाही तोपर्यंत शेवगाव तालुक्यातील दुकाने आजपासून बेमुदत बंद राहणार आहे. उद्या गुरुवारी संघटनेचे शिष्टमंडळ जिल्हाधिकाऱ्यांची समक्ष भेट घेणार आहेत. निवेदनावर संघटनेचे अध्यक्ष ज्ञानेश्वर शिंदे यांचेसह जगदीश धूत , बंडू सागडे, संदीप जावळे, संजय लांडे, पांडुरंग मोटकर, राम नारायण लाहोटी, अरुण खंडागळे, मोटकर मेजर, तुळशीराम विघ्ने, सौरभ पवार, रामनाथ केसभट, संभा गावडे, भारत पठाडे आदी पदाधिकाऱ्यांच्या सहया आहे.
