Agniveer : अग्निपथ योजनेअंतर्गत भारतीय नौदलात दाखल झालेल्या अग्निवीरांची पहिली बॅच 21 नोव्हेंबर 2026 रोजी चार वर्षांची सेवा पूर्ण करून निवृत्त होणार आहे. या अग्निवीरांपैकी सुमारे 75 टक्के जणांना सेवा पूर्ण झाल्यानंतर बाहेर पडावे लागेल, तर कामगिरीच्या आधारावर 25 टक्के अग्निवीरांना नियमित सेवेत कायम ठेवले जाणार आहे.

दरम्यान, निवृत्त होणाऱ्या अग्निवीरांच्या पुढील भविष्यासाठी केंद्र आणि विविध राज्य सरकारांकडून अनेक सुविधा जाहीर करण्यात आल्या आहेत.

सेवा निधीतून मिळणार 10.04 लाख रुपये –

चार वर्षांची सेवा पूर्ण केल्यानंतर प्रत्येक अग्निवीराला सुमारे 10.04 लाख रुपयांचा सेवा निधी मिळेल. या रकमेत अग्निवीराचे योगदान, सरकारचा समान वाटा आणि त्यावरील व्याजाचा समावेश आहे. ही रक्कम करमुक्त असल्याचे सांगण्यात आले आहे.

48 लाखांचे जीवन विमा कवच –

सेवेच्या काळात अग्निवीरांना 48 लाख रुपयांचे जीवन विमा कवच मिळते. त्यामुळे सेवा कालावधीत मृत्यू झाल्यास त्यांच्या कुटुंबाला आर्थिक आधार मिळतो. निवृत्तीनंतर मात्र अग्निवीरांना ग्रेच्युइटी, पेन्शन तसेच आजीवन वैद्यकीय आणि कॅन्टीन सुविधा मिळणार नाहीत.

सरकारी नोकरीच्या संधी –

निवृत्त अग्निवीरांना कौशल्य प्रमाणपत्र दिले जाणार आहे. त्याचा उपयोग पुढील नोकरीसाठी होऊ शकतो. केंद्र सरकारने केंद्रीय सशस्त्र पोलीस दलांमध्ये (CAPF) कॉन्स्टेबल आणि रायफलमन पदांसाठी माजी अग्निवीरांसाठी 50 टक्के आरक्षणाची तरतूद केली आहे. यासाठी ‘माजी अग्निवीर’ अशी स्वतंत्र श्रेणीही करण्यात आली आहे.

राज्य सरकारांकडूनही आरक्षण –

महाराष्ट्र, उत्तर प्रदेश, उत्तराखंड, हरियाणा, राजस्थान आणि मध्य प्रदेशसह काही राज्यांनी पोलीस व इतर सरकारी नोकऱ्यांमध्ये माजी अग्निवीरांसाठी आरक्षण जाहीर केले आहे. काही ठिकाणी 10 ते 20 टक्के आरक्षणासोबत वयोमर्यादेत 3 ते 5 वर्षांची सूट देण्यात आली आहे. काही भरती प्रक्रियांमध्ये शारीरिक चाचण्यांमधूनही सूट देण्याची तरतूद आहे.

नोकरीसाठी विशेष पोर्टल –

माजी अग्निवीरांना सरकारी तसेच खासगी क्षेत्रातील नोकरीच्या संधी मिळाव्यात, यासाठी गृह मंत्रालयाकडून विशेष पोर्टल तयार करण्याचे काम सुरू असल्याचे सांगण्यात आले आहे. या माध्यमातून त्यांच्या कौशल्यानुसार रोजगाराच्या संधी उपलब्ध करून देण्याचा प्रयत्न केला जाणार आहे.