मुंबई – अर्थमंत्री निर्मला सीतारामन यांनी आज एनडीए सरकारचा अर्थसंकल्प सादर केला. यावेळी त्यांनी अनेक मोठ्या घोषणा केला. बजेटमधील निर्णयांमुळे सोनं-चांदीच्या दरात मोठी कपात झाली. याचा परिणाम खरेदीवर दिसून येत आहे. लोक सोनं खरेदी करण्यासाठी सराफा दुकानांमध्ये गर्दी करत असल्याचे चित्र अनेक शहरांत पहायला मिळत आहे. जळगाव आणि पुण्याच्या सराफ बाजारात याचा परिणाम दिसून आला आहे. अवघ्या दोन तासांमध्ये प्रति तोळा 3 हजारांनी सोनं स्वस्त झाल्याचे सांगितले जात आहे. राजधानी मुंबईत सोन्याचे दर तब्बल 5 हजार रुपयांनी कमी झाले आहेत. आजच्या अर्थसंकल्पात अर्थमंत्री सीतारामन यांनी सोन्याच्या कस्टम ड्युटीमध्ये मोठी कपात करण्याचा निर्णय घेण्यात आला. या निर्णयाची घोषणा होताच अवघ्या दोन तासांमध्ये जळगाव व पुण्यातील सराफा बाजारात परिणाम दिसायला लागले आहेत. सोन्याच्या दरात घट झाल्याचे पाहून ग्राहकांकडून आनंद व्यक्त केला जात आहे. आज झालेल्या निर्णयामुळे सराफा बाजारात सोने चांदी खरेदीसाठी ग्राहकांनी गर्दी केल्याचे अनेक दुकानदारांनी सांगितले. याआधी सोने-चांदीचे सीमा शुल्क 15 टक्के होते. आता यात कपात करून सीमा शुल्क थेट 6 टक्क्यांवर आणण्यात आले आहे. म्हणजेच सरकारने सीमा शुल्क थेट निम्मे केले केल्याने सोन्याच्या दरात मोठी घट झाली आहे. प्रतितोळा सोन्यामागे तब्बल 2 हजार रुपयांची घट झाल्याचं सांगितले जात आहे. काय बदल झाले ? – सोने, चांदीवरील सीमा शुल्क – 6 टक्के – प्लॅटिनमवरील सीमा शुल्क- 6.4 टक्के जाणून घ्या, तुमच्या शहरातील सोन्याचे दर – सोलापूरमध्ये सोन्याचे दर आधी – 73500 होते ते आता – 71500 अंदाजे झाले आहेत. चांदीचे दर आधी – 92000 होते, आता – 91000 (अंदाजे) झाले आहेत. बुलढाणामध्ये सोने काल 73000 प्रति 10 ग्रॅम होते आज – 68000 प्रति 10 ग्रॅमपर्यंत आहे. चांदीचे दर काल 91650 प्रति किलो तर आज 84330 प्रति किलोपर्यंत खाली आले आहेत. वाशिममध्ये सोन्याच्या किंमतीत आज तीन हजार रुपयांची कपातीनंतर 70,500 रुपये दहा ग्रामवर आले आहे. तर चांदीत सहा हजार रुपयांची कपात होऊन 86 हजार प्रति किलोवर आली आहे. परभणीत सोने 73200 रुपयांवरून 71000 रुपये तर चांदी 89500 किलो वरुन 87500 किलोवर आली आहे. अमरावतीमध्ये सोनं 73400 वरुन 71300, तर चांदी 91000 रुपयांवरु 88000 वर आली आहे. हिंगोलीत सोने 74000 वरुन 71700, चांदी 92000 वरुन 88000, नांदेडमध्ये सोनं 74,400 वरुन 71800, चांदी 91400 वरुन 88000वर पोहोचली आहे. याच प्रकारे अनेक शहरांतील सोन्याच्या दरांमध्ये मोठी कपात झाल्याचे सांगितले जात आहे.
