मुंबई : काही दिवसांपूर्वी अभिनेते राहुल सोलापूरकर यांनी छत्रपती शिवाजी महाराज यांच्याबद्दल वादग्रस्त वक्तव्य केले होते. त्यानंतर आता त्यांनी डॉ. बाबासाहेब आंबेडकरांविषयी वादग्रस्त वक्तव्य केले आहे. त्यांच्या या वक्तव्यामुळे त्यांच्या अडचणींमध्ये वाढ होण्याची शक्यता आहे. राहुल सोलापूरकर यांच्या वक्तव्यानंतर रिपाइं खरात गटाचे नेते सचिन खरात यांनी आक्रमक भूमिका घेत राहुल सोलापूरकरांनी माफी मागावी अन्यथा त्यांच्या तोंडाला काळे फासू अशी भूमिका घेतली. काय म्हणाले राहुल सोलापूरकर? रामजी सकपाळ नावाच्या या एका बहुजना घरात जन्माला आलेले भीमराव जो आंबेडकर नावाच्या गुरुजीकडून दत्तक घेतला जातो आणि त्यांचेच नाव पुढं वापरतो. तो भीमराव प्रचंड अभ्यास केल्याने वेदां म्हटल्या प्रमाणे आपल्या अभ्यासाने ब्राह्मण ठरतो, असे वक्तव्य राहुल सोलापूरकर यांनी केले. सचिन खरातांनी राहुल सोलापूरकर यांना दिला इशारा डॉ.बाबासाहेब आंबेडकर यांना दत्तक घेतलं म्हणणाऱ्या राहुल सोलापूरकर यांनी माफी मागावी, अन्यथा तोंडाला काळे फासू, असा इशारा रिपाइं खरात गटाचे नेते सचिन खरात यांनी दिला आहे. राहुल सोलापूरकर यांनी एका मुलाखती दरम्यान बोलताना म्हणाले डॉ.बाबासाहेब आंबेडकरांना दत्तक घेतलं आणि वेदानुसार बाबासाहेब ब्राम्हण ठरतात हे विधान अत्यंत निषेधार्थ वक्तव्य केलं असल्याचे खरात यांनी म्हटले. राज्य सरकारने तात्काळ सोलापूरकर यांच्यावर कारवाई करावी आणि राहुल सोलापूरकर यांनी डॉ. बाबासाहेब आंबेडकर यांच्या बुटावर नाक घासून माफी मागावी, अन्यथा त्यांच्या तोंडाला काळे फासू असा इशारा सचिन खरात यांनी दिला आहे. छत्रपती शिवाजी महाराजांविरोधात वादग्रस्त वक्तव्य राहुल सोलापूरकर यांनी एका मुलाखतीमध्ये छत्रपती शिवाजी महाराज हे आग्राहून लाच देऊन निसटले होते. त्यांनी मिठाईच्या पेटाऱ्याचा वापर केला नव्हता. महाराजांनी लाच दिल्याचे पुरावे असल्याच्या आशयाचे वक्तव्य केले होते. त्यांच्या या वक्तव्यामुळे राज्यात संतापाची लाट उसळली. विविध संघटनांसह राजकीय पक्षांनीदेखील तीव्र आंदोलन केले. यानंतर राहुल सोलापूरकर यांनी दिलगिरी व्यक्त केली होती.
