Imran Khan nominated for Nobel Peace Prize | सध्या तुरुंगात असलेले पाकिस्तानचे माजी पंतप्रधान इम्रान खान यांना मानवाधिकार आणि लोकशाहीसाठी केलेल्या प्रयत्नांबद्दल प्रतिष्ठित नोबेल शांतता पुरस्कारासाठी नामांकन मिळाले आहे. 72 वर्षीय इम्रान खान यांचे नाव पाकिस्तान वर्ल्ड अलायन्स (PWA) आणि नॉर्वेमधील राजकीय पक्ष सेंट्रम यांच्या पाठिंब्याने पुढे आले आहे.

सेंट्रम पक्षाने रविवारी सोशल मीडिया प्लॅटफॉर्म एक्स (पूर्वीचे ट्विटर) वर पोस्ट करत माहिती दिली की, “आम्हाला हे जाहीर करताना आनंद होत आहे की नामांकन करण्याचा अधिकार असलेल्या व्यक्तीच्या माध्यमातून आम्ही इम्रान खान यांना पाकिस्तानमधील मानवाधिकार आणि लोकशाहीसाठी केलेल्या कार्याबद्दल नोबेल शांतता पुरस्कारासाठी नामांकित केले आहे.”

नोबेल पुरस्कार 2025 साठी नामांकन करण्याची अंतिम तारीख 31 जानेवारी होती. नोबेल पुरस्कार देणाऱ्या संस्थेने दिलेल्या माहितीनुसार, यावर्षी 338 व्यक्ती आणि संस्थांचे नामांकन प्राप्त झाले आहे, ज्यात 244 व्यक्ती आणि 94 संघटनांचा समावेश आहे.

यापूर्वी 2019 मध्ये देखील इम्रान खान यांना दक्षिण आशियामध्ये शांतता वाढवण्यासाठी केलेल्या प्रयत्नांबद्दल नोबेल पुरस्कारासाठी नामांकित करण्यात आले होते. नॉर्वेजियन नोबेल समितीला दरवर्षी शेकडो नामांकनं मिळतात आणि त्यानंतर सुमारे आठ महिन्यांच्या प्रक्रियेनंतर विजेत्याची निवड केली जाते.

पाकिस्तान तहरीक-ए-इंसाफ (PTI) पक्षाचे संस्थापक असलेले इम्रान खान ऑगस्ट 2023 पासून तुरुंगात आहेत. जानेवारी 2024 मध्ये त्यांना भ्रष्टाचार आणि अधिकारांचा गैरवापर केल्याच्या प्रकरणात 14 वर्षांची शिक्षा सुनावण्यात आली आहे.

दोन वर्षांपासून माजी पंतप्रधानांना तुरुंगवास

यापूर्वी सरकारी मालमत्ता विकणे, गोपनीय कागदपत्रे लीक करणे आणि बेकायदेशीर विवाह यांसारख्या प्रकरणांमध्ये त्यांच्यावर गुन्हे दाखल झाले होते. मात्र, काही प्रकरणांमध्ये न्यायालयाने त्यांची शिक्षा रद्द किंवा स्थगित केली आहे. एप्रिल २०२२ मध्ये, इम्रान खान यांना अविश्वास प्रस्तावाद्वारे पंतप्रधानपदावरून हटवण्यात आले होते, परंतु त्यांनी आपल्यावरील सर्व आरोप राजकीय हेतूने प्रेरित असल्याचे म्हटले आहे.