Advay Hiray Joins BJP : नाशिकच्या राजकीय वर्तुळातून एक मोठी बातमी समोर आली आहे. महापालिका निवडणुकीच्या तोंडावर अनेक पक्षप्रवेश होताना दिसत आहे. त्यातच उबाठा म्हणजेच उद्धव बाळासाहेब पक्षाला लागलेली गळती काही थांबायचे नाव घेईना. अनेक नेत्यांनी निवडणुकीच्या तोंडावर पक्षाची साथ सोडली. त्यातच आता पक्षाचे उपनेते अद्वय हिरे यांनी उद्धव ठाकरेंना जय महाराष्ट्र करत भाजपमध्ये प्रवेश केला आहे. उद्धव ठाकरेंसाठी हा मोठा धक्का मानला जात आहे. नाशिकच्या राजकारणात हिरे कुटुंबियांचं वर्चवस्व राहिलेलं आहे. विशेष म्हणजे मालेगावात हिरे कुटुंबियांची ताकद आहे. त्यामुळे आगामी नगर पंचायत, नगर परिषद निवडणुकांमध्ये ठाकरेंच्या शिवसेनेसाठी हा मोठा धक्का मानला जात आहे. अद्वय हिरे यांच्या पक्षप्रवेशाने भाजपची नाशिक जिल्ह्यात खूप मोठी ताकद वाढणार आहे. कोण आहेत अद्वय हिरे ? नाशिक–मालेगाव परिसरात हिरे घराण्याचा प्रभाव प्रचंड आहे. 2004 मध्ये राष्ट्रवादीकडून प्रशांत हिरे यांनी निवडणूक लढवली होती. मात्र त्यांचा पराभव नवख्या दादा भुसे यांनी करून राजकारणातील समीकरणेच बदलून टाकली. त्यानंतर 2009 आणि पुढील काळात भुसे यांनी मालेगाव बाह्य मतदारसंघात शिवसेनेचा भगवा कायम टिकवला. हिरेंना 2014 नंतर भाजपमधील कामकाज आणि मोदींच्या नेतृत्वाची ओढ निर्माण झाली. याच काळात अद्वय आणि अपूर्व हिरे दोघांनीही भाजपमध्ये प्रवेश केला आणि आपल्या नवीन राजकीय प्रवासाला सुरुवात केली. अद्वय हिरे यांनी 27 जानेवारी 2023 रोजी शिवबंधन हातात बांधत ठाकरे गटात प्रवेश केला. त्या वेळी त्यांनी मालेगावच्या राजकारणात आपल्या नवीन इनिंगची सुरुवात केली होती. महाविकास आघाडी सत्तेत असताना अद्वय हिरे यांनी शिवसेना मंत्र्यांविरोधात उघड भूमिका घेतली होती. नंतर शिंदे–भाजप सरकार आल्यानंतर त्यांनी भाजप सोडून उद्धव ठाकरे गटात प्रवेश करण्याचा निर्णय घेतला. अद्वय हिरे यांनी शिंदे गटाच्या दादा भुसे यांना 2024 सालच्या विधानसभेच्या निवडणुकीत कडवे आव्हान दिले होते. मात्र या निवडणुकीत त्यांना पराभव सहन करावा लागला होता. आता अद्वय हिरे हे पुन्हा एकदा आज भाजपमध्ये प्रवेश करणार आहेत. त्यामुळे त्यांच्या भाजप प्रवेशामुळे पुन्हा एकदा भुसे विरुद्ध हिरे हा राजकीय संघर्ष तीव्र होण्याची शक्यता वर्तवली जात आहे.
