पुणे – आयुक्त निर्णय घेतात, मात्र अंमलबजावणी करणारी यंत्रणाच खऱ्या अर्थाने प्रशासन असते. या यंत्रणेत लोकाभिमुखतेची सांघिक भावना आवश्यक आहे, असे मत पुणे महापालिकेचे माजी आयुक्त रमानाथ झा यांनी व्यक्त केले. पुणे महानगरपालिका सेवानिवृत्त सेवक संघाच्या सुवर्ण महोत्सवी वर्षाच्या सांगता समारंभात ते बोलत होते. “आयुक्तांनी घेतलेल्या निर्णयांची फलद्रुप अंमलबजावणी अधिकारी ते सेवक वर्ग करत असतो. त्यामुळे प्रशासन हे केवळ निर्णय घेणारे नसून, ते प्रभावीपणे अंमलबजावणी करणारे संघटनही असते,” असे त्यांनी नमूद केले. झा यांनी आपल्या कार्यकाळात घेतलेल्या निर्णयांचे श्रेय सेवक वर्गाला दिले. “सेवानिवृत्तीनंतरचे आयुष्य हे समाजासाठी योगदान देण्याची संधी असते, असेही त्यांनी सांगितले. कार्यक्रमाला संघाचे अध्यक्ष जयंत पवार, ज्येष्ठ सल्लागार गोपाळ तिवारी, माजी उपायुक्त नंदकुमार जगताप, कामगार नेत्या मुक्ता मनोहर आदी मान्यवर उपस्थित होते. गोपाळ तिवारी यांनी महापालिका ही लोकप्रतिनिधी आणि प्रशासन यांच्या संयुक्त प्रयत्नाने चालणारी स्वायत्त संस्था असल्याचे सांगितले. कार्यक्रमात निवृत्त सेवकांचा सन्मान करण्यात आला. सूत्रसंचालन शिल्पा देशपांडे तर आभार बापूसाहेब खलाटे यांनी मानले.
