Aditi Tatkare : महाराष्ट्र शासनाच्या महत्त्वाकांक्षी ‘लेक लाडकी योजने’च्या नियमांमध्ये महिला व बालविकास विभागाने (Aditi Tatkare) अत्यंत मोठा आणि दिलासादायक बदल केला आहे. आता या योजनेच्या लाभासाठी पालकांना अंगणवाडी केंद्रांचे खेटे घालण्याची किंवा किचकट कागदपत्रांच्या जंजाळात अडकण्याची अजिबात गरज उरणार नाही.

महिला व बालविकास मंत्री आदिती तटकरे (Aditi Tatkare) यांनी दिलेल्या माहितीनुसार, आता महाडीबीटी २.० पोर्टलवरून थेट घरबसल्या ऑनलाइन अर्ज करण्याची क्रांतीकारक सुविधा सुरू करण्यात आली आहे. यापूर्वीच्या नियमांनुसार लाभार्थ्यांना प्रत्यक्ष जवळच्या अंगणवाडी केंद्रात जाऊन कागदपत्रांसह अर्ज सादर करावा लागत असे.

त्यानंतर ते अर्ज प्रकल्प स्तरावर जमा होऊन जुन्या पोर्टलवर नोंदवले जायचे, आणि मग छाननी व मंजुरीची एक लांबलचक वाट पाहावी लागायची. दुर्गम भाग किंवा ज्या गावांमध्ये अंगणवाडी केंद्र कार्यान्वित नव्हते, तिथल्या गरजू कुटुंबांपर्यंत योजनेचा लाभ पोहोचणे अत्यंत कठीण ठरत होते.

शासनाने नवीन शासन प्रक्रिया पुनर्रचना लागू करून संपूर्ण यंत्रणेला नवा चेहरा दिला आहे. आता आवश्यक कागदपत्रांची संख्या लक्षणीयरीत्या कमी करण्यात आली असून अर्ज नोंदणी, छाननी, मंजुरी आणि प्रत्यक्ष लाभ मिळण्यापर्यंतची संपूर्ण साखळी पारदर्शक व ऑनलाइन झाली आहे.

अर्जदारांना त्यांच्या अर्जाची सद्यस्थिती घरबसल्या मोबाईलवरून ट्रॅक करता येणार आहे. अनुदानाची रक्कम थेट बँक खात्यात जमा करण्याचा निर्णय आधीच लागू असून, आता अर्ज प्रक्रियाही पूर्णपणे डिजिटल झाल्याने योजनेतील सर्व अडथळे दूर झाले आहेत. राज्यात आतापर्यंत २ लाख ९८ हजार ६९५ लाभार्थ्यांना पहिला हप्ता यशस्वीरीत्या वितरित करण्यात आला असून, या नव्या सुविधेमुळे लाखो कन्यांच्या भविष्याला नवी गती (Aditi Tatkare) मिळणार आहे.