Isha Koppikar: ‘खल्लास’ गाणं आठवलं की सर्वात आधी आठवते ती अभिनेत्री ईशा कोप्पिकर. आपल्या दमदार डान्स आणि अभिनयाने ईशाने एकेकाळी बॉलिवूडमध्ये वेगळी ओळख निर्माण केली. ‘कंपनी’ चित्रपटातील ‘खल्लास’ गाण्यामुळे ती रातोरात लोकप्रिय झाली आणि तिची ओळख ‘खल्लास गर्ल’ म्हणून झाली. आज, १९ सप्टेंबर रोजी ईशा कोप्पिकर आपला ५०वा वाढदिवस साजरा करत आहे. तिच्या वाढदिवसानिमित्त जाणून घेऊया तिच्या फिल्मी प्रवासाबद्दल.

मॉडेलिंगपासून केली सुरुवात

ईशा कोप्पिकरचा जन्म १९ सप्टेंबर १९७६ रोजी मुंबईत झाला. तिने मुंबईतच शिक्षण घेतलं. विज्ञान शाखेतून तिने पदवीचं शिक्षण पूर्ण केलं. कॉलेजमध्ये असतानाच तिचा कल मॉडेलिंगकडे वळला. प्रसिद्ध फोटोग्राफर गौतम राजाध्यक्ष यांच्या फोटोशूटमध्ये ईशा झळकली होती. त्यानंतर तिने अनेक जाहिराती आणि ब्रँड्ससाठी मॉडेलिंग केलं. १९९५ मध्ये तिने मिस इंडिया स्पर्धेतही भाग घेतला. या स्पर्धेत तिला ‘मिस टॅलेंट’ हा किताब मिळाला. मॉडेलिंगमुळेच तिच्यासाठी मनोरंजन क्षेत्राचे दरवाजे उघडले.

साउथ सिनेमातून अभिनयाला सुरुवात

ईशाने आपल्या अभिनय कारकिर्दीची सुरुवात दक्षिण भारतीय सिनेमातून केली. १९९७ मध्ये तेलुगू चित्रपटातून तिने अभिनय क्षेत्रात पदार्पण केलं. त्यानंतर तिने तमिळ चित्रपटांमध्येही काम केलं. ‘कधल कविधाई’, ‘एन स्वासा काट्रे’ आणि ‘नेन्जीनीले’ यांसारख्या चित्रपटांमध्ये ती दिसली. साउथ सिनेमात काम केल्यानंतर ईशाने बॉलिवूडकडे मोर्चा वळवला. २००० मध्ये ती ‘फिझा’ या चित्रपटात छोट्या भूमिकेत दिसली. त्यानंतर ‘राहुल’, ‘प्यार इश्क और मोहब्बत’ यांसारख्या चित्रपटांमध्ये तिने काम केलं.

‘खल्लास’ गाण्याने बदललं आयुष्य

ईशाच्या करिअरमधला सर्वात मोठा टर्निंग पॉइंट २००२ मध्ये आला. राम गोपाल वर्मा यांच्या ‘कंपनी’ या चित्रपटात तिला काम करण्याची संधी मिळाली. या चित्रपटातील ‘खल्लास’ या गाण्यात ईशाने केलेल्या डान्सने प्रेक्षकांचं लक्ष वेधून घेतलं. गाणं प्रचंड लोकप्रिय झालं आणि ईशाला रातोरात मोठी प्रसिद्धी मिळाली. तिच्या या डान्समुळे ती ‘खल्लास गर्ल’ म्हणून ओळखली जाऊ लागली. यानंतर ‘कांटे’ चित्रपटातील ‘इश्क समुंदर’ या गाण्यातही तिचा डान्स पाहायला मिळाला. या गाण्यालाही प्रेक्षकांची पसंती मिळाली.

अनेक गाजलेल्या चित्रपटांमध्ये काम

‘खल्लास’नंतर ईशाने अनेक हिंदी चित्रपटांमध्ये काम केलं. ‘पिंजर’, ‘डरना मना है’, ‘दिल का रिश्ता’, ‘कयामत’, ‘रुद्राक्ष’, ‘कृष्णा कॉटेज’, ‘क्या कूल हैं हम’, ‘डॉन’ आणि ‘इक विवाह ऐसा भी’ यांसारख्या चित्रपटांचा तिच्या कारकिर्दीत समावेश आहे. ‘पिंजर’ या चित्रपटाला राष्ट्रीय चित्रपट पुरस्कार मिळाला होता. त्यामुळे ईशाच्या कारकिर्दीत या चित्रपटाचही विशेष महत्त्व आहे.

राजकारणातही केलं पदार्पण

अभिनय क्षेत्रात काम केल्यानंतर ईशाने राजकारणातही प्रवेश केला. २०१९ मध्ये केंद्रीय मंत्री नितीन गडकरी यांच्या उपस्थितीत ती भारतीय जनता पक्षात सहभागी झाली. पक्षात तिला महिला परिवहन शाखेची जबाबदारी देण्यात आली होती.

मॉडेलिंगपासून सुरू झालेला ईशाचा प्रवास साउथ सिनेमा, बॉलिवूड आणि त्यानंतर राजकारणापर्यंत पोहोचला. मात्र, ‘कंपनी’मधील ‘खल्लास’ गाण्यामुळे मिळालेली ‘खल्लास गर्ल’ ही ओळख आजही तिच्या चाहत्यांच्या आठवणीत कायम आहे.