Accident News : होळीच्या सणासाठी बाजारात खरेदी करण्यासाठी जात असताना तीन अल्पवयीन मुलांचा अपघातात (Accident News) मृत्यू झाल्याची घटना घडली आहे. तेल्हारा शहराजवळील शेरी फाट्याजवळ दुचाकी आणि आयशर ट्रकच्या भीषण धडकेत माळेगाव येथील या तीन मुलांचा अंत झाला. दर्शन रामेश्वर वैष्णव (१६), साई रामेश्वर वैष्णव (१२) आणि गणेश दीपक आपतुरकर (१६) अशी मृत्यू पावलेल्या अल्पवयीन मुलांची नावे आहेत. मिळालेल्या माहितीनुसार, ही तीन मुले दुचाकीने तेल्हारा शहराकडे होळीसाठी बाजार करायला जात होती. शेरी फाट्याजवळ समोरून येणाऱ्या एका आयशरने त्यांच्या दुचाकीला जोरदार धडक दिली. ही धडक इतकी भीषण होती की, दोन मुलांचा जागीच मृत्यू झाला, तर तिसऱ्या मुलाने रुग्णालयात नेताना वाटेतच प्राण सोडले. अपघातानंतर आयशर वाहन पोलिसांनी ताब्यात घेतले आहे. तिन्ही मृतदेहांचे तेल्हारा ग्रामीण रुग्णालयात शवविच्छेदन करण्यात आले आहे. पोलीसांनी याप्रकरणी गुन्हा दाखल करण्याची प्रक्रिया सुरू केली आहे.