Abhishek Banerjee : तृणमूल नेते अभिषेक बॅनर्जी (Abhishek Banerjee) यांनी बुधवारी केंद्रीय निवडणूक आयोगावर गंभीर आरोप केले. पश्चिम बंगालमध्ये सुरू असलेल्या विशेष पुनरावलोकन प्रक्रियेदरम्यान काही निवडणूक अधिकारी सर्वोच्च न्यायालयाच्या निर्देशांचे उल्लंघन करत आहेत आणि अधीनस्थांना व्हॉट्सॲपद्वारे सूचना देत आहेत, असा थेट आरोप त्यांनी केला. आपल्या अधिकृत सोशल मिडिया अकाउंटवरुन कथित व्हॉट्सॲप ग्रुप चॅटचे स्क्रीनशॉट शेअर करत बॅनर्जी म्हणाले की सर्वोच्च न्यायालयाने पारदर्शकता आणि अधिकृत संप्रेषणाच्या माध्यमांचे पालन करण्यावर भर दिला आहे. औपचारिक आणि जबाबदार यंत्रणांऐवजी व्हॉट्सॲपवरून सूचना देणे ही प्रक्रिया बायपास करण्यासारखी बाब आहे, असा आरोप त्यांनी केला. विशेष रोल निरीक्षक सी. मुरुगन यांनी मायक्रो ऑब्झर्व्हरना थेट जन्म प्रमाणपत्रे स्वीकारण्याबाबत सूचना दिल्याचा दावा करत त्यांनी प्रक्रियेवर प्रश्नचिन्ह उपस्थित केले. काही जिल्ह्यांशी संबंधित लॉगिन क्रेडेन्शियल्सचा गैरवापर होत असल्याचाही आरोप त्यांनी केला. तृणमूल काँग्रेस हा मुद्दा सर्वोच्च न्यायालयात उपस्थित करणार असल्याचे बॅनर्जी यांनी स्पष्ट केले. दरम्यान, मुख्यमंत्री ममता बॅनर्जी यांनी आयोगावर टीका केल्यानंतर अवघ्या २४ तासांत हे आरोप समोर आले आहेत.
