नेवासा: महिलांवरील होणारे अत्याचार आणि वाढत्या भ्रष्टाचाराविरोधात आवाज उठविण्यासाठी रायचूर जिल्ह्यातील लिंगसुगूर तालुक्यातील बेंदोनी गावची तीस वर्षीय युवती मंजुला मेगीमुखा हिने थेट दिल्लीकडे आपली पायीवारी सुरु केली आहे. शनिवार (दि.१२) रोजी तिने श्रीक्षेत्र देवगड देवस्थान येथे भेट देत गुरुवर्य भास्करगिरी महाराजांचे दर्शन घेवून आपल्या यात्रेच्या पुढील टप्याचा प्रवास सुरू ठेवला आहे.

महिलांवरील मोठ्या प्रमाणात वाढते अत्याचार आणि भ्रष्टाचार या विरोधात या युवतीने २५ मार्चपासून आपली दिल्लीकडे पायीवारी सुरु केलेली असून दररोज ही युवती सुमारे ५० किलोमीटर पायी अंतर पार करत आहे. शनिवार (दि.१२) रोजी मंजुला हिने श्रीक्षेत्र देवगड, प्रवरासंगम मार्गे गंगापूर येथे भेट दिली आहे. त्यानंतर तिने लासूर, कन्नड आणि वेरुळ मार्गे तीने आपला पुढील प्रवासास सुरुवात केलेली आहे. या दैनंदिन सुरु असलेल्या या प्रवासात ही युवती विविध गावांमध्ये थांबून महिला व नागरिकांशी सुसंवाद साधत आहे. तिने सुरु केलेल्या आपल्या लढ्याचे महत्त्व सांगत असून या लढ्याला जनतेतून मोठा पाठींबा मिळत आहे.