जुन्नर : जुन्नर पोलीस ठाणे हद्दीत नाणेघाट येथे नानाचा अंगठा या डोंगरावर फिरण्यासाठी गेलेल्या ४ मित्रांपैकी एकाचा डोंगरकड्यावरून पाय घसरून दरीत पडून मृत्यू झाल्याची घटना दि २० जुलै रोजी घडली असून त्याचा मृतदेह दि २१ रोजी शोधून काढण्यात मुरबाड येथील सह्यगिरी रेस्क्यू टीमला यश आले आहे.

दत्ता विनायक लोंढे वय २२ वर्षे राहणार -पारगाव तालुका आंबेगाव, जिल्हा पुणे असे दरीत पडून मृत्यू झालेल्या युवकाचे नाव असून पोलिसांनी दिलेल्या माहितीनुसार, तेजस लक्ष्मण काटे वय २५ वर्ष, सुनील बाबुराव पवार वय २३ वर्ष, अनिकेत संदीप ढोबळे वय २२, वर्षे दत्ता विनायक लोंढे वय २२ वर्षे सर्व राहणार -पारगाव तालुका आंबेगाव, जिल्हा पुणे हे चौघेजण नाणेघाट परिसरातील नानाचा अंगठा या ठिकाणी फिरण्यासाठी गेले होते.

परंतु त्यांचे अगोदर अर्धवट वाटेतून परत जातो म्हणून निघालेला दत्ता लोंढे हा पार्किंगच्या ठिकाणी गाडीमध्ये मिळून आला नाही म्हणून त्याच्या सोबतच्या मित्रांनी इतर स्थानिकांसह शोध घेतला असता कोठेही दिसून आला नाही.

सदर घटनेची माहिती मिळताच तात्काळ जुन्नर पोलीस ठाण्याचे सहाय्यक पोलीस निरीक्षक संकेत चौधरी व पथक रवाना करून आपदा विभागातील रेस्क्यू टीम, फॉरेस्ट विभाग यांना माहिती देऊन सदर ठिकाणी शोध व बचाव कार्य सुरू केले असता दाट धुक्यामुळे दरीमध्ये काहीही दिसून येत नसल्याने शोधण्यात अडचण निर्माण झाली.

सदर युवकाची डोंगरावर अर्धवट ठिकाणी एक चप्पल मिळून आल्याने तसेच दरीत घसरल्याच्या खुणा दिसल्याने सदर युवक पावसामध्ये पाय घसरून दरीत पडला असण्याची दाट शक्यता वाटली. घटनास्थळी आपदा मित्र सुशांत भुजबळ रेस्क्यू टीम सदस्य आदित्य डेरे, शंतनू डेरे जुन्नर पोलीस स्टेशनचे पोलीस निरीक्षक दत्तात्रय गुंड, वनपरिक्षेत्राधिकारी प्रदीप चव्हाण यांनी थर्मल ड्रोन द्वारे या ठिकाणी पाहणी केली असता पाऊस वारा व धुके यांचा अंदाज न आल्याने शोध मोहीम थांबवली होती.

दि २१ सकाळी ७.०० वाजता पुन्हा शोधमोहीम मुरबाडच्या दिशेने चालू केली असता मुरबाड येथील दीपक विशे यांच्या सह्य गिरी रेस्क्यू टीमच्या कुसुम विशे,संदेश गपाट, हेमंत ठोंबरे रामदास ठोंबरे, मारुती वाघ,हरि लोबी, समीर ठोंबरे यांनी सुमारे साडे तीन तास अथक प्रयत्न करून ९.३० च्या दरम्यान सदर युवकाचा मृतदेह घोणे घाट येथून शोधून काढला आहे.

पोलीस प्रशासन वन विभाग व अपदा पथके,रेस्क्यू टीम्स यांचे कार्य सुरू असून नागरिकांनी अशा परिसरात जाताना सतर्कता बाळगण्याचे व घालून दिलेल्या नियमांचे पालन करण्याचे प्रशासनाकडून आवाहन करण्यात येत आहे.

मुरबाड तालुक्यातील सह्यगिरी रेस्क्यु टीमने या वर्षभरात दहा बचाव कार्य केले असून त्यापैकी सहा बचाव कार्यामध्ये मृतदेह शोधून काढले आहेत हे मृतदेह २० ते २५ वयोगटातील असून तरुणांनी फिरायला जाताना नको ते धाडस करू नये.

दीपक विशे, सहयगिरी रेस्क्यू टीम, मुरबाड