राजगुरुनगर : राजगुरुनगर येथे दिवाळीच्या खरेदीसाठी बाजारात आलेल्या महिलेजवळील पैसे आणि मोबाईल असलेली पर्स हिसकावून दुचाकीवर पळून जात असलेल्या चोरट्याला नागरिकांनी पकडले. पर्स चोरणाऱ्या चोरट्याला नागरिकांकडून बेदम चोप देऊन त्याला पोलिसांच्या स्वाधीन करण्यात आले. ही घटना आज (दि. १६) रोजी सकाळी साडेअकरा वाजण्याच्या सुमारास राजगुरुनगर शहरातील वाडा रस्त्याजवळ घडली. दिवाळीच्या खरेदीसाठी राजगुरुनगर शहरातील वाडा रस्त्याने जात असलेल्या महिलेची पैसे आणि मोबाईल असलेली पर्स मागून दुचाकीवर आलेल्या चोरट्याने हिसकावून पळून जाण्याचा प्रयत्न केला. मात्र, यावेळी रस्त्यात वाहनांची गर्दी होती. पर्स चोरून नेत असताना महिलेने आरडाओरड केला. त्यावेळी गर्दीने भरलेल्या रस्त्यावरील नागरिकांनी चोरट्याला अडवले. वाहतूक कोंडी झाल्याने चोरट्याला दुचाकीवरून पलायन करता आले नाही. यानंतर काही युवकांनी त्याला खेड पंचायत समितीच्या कोपऱ्यात नेवून चोप दिला. या घटनेची माहिती पोलिसांना मिळताच पोलिस घटनास्थळी दाखल झाले. या सराईत चोरट्याला पोलिसांनी ताब्यात घेतले आहे. रस्त्यात घडलेल्या या घटनेमुळे शहरात काही काळ वाहतूक कोंडी झाली होती. पुढील तपास पोलिस करत आहेत.
