Kota Srinivasa Rao Passes Away : दाक्षिणात्य सिनेसृष्टीतून एक दुःखद बातमी समोर आली आहे. दिग्गज अभिनेते आणि आंध्र प्रदेशचे माजी आमदार कोटा श्रीनिवास राव यांचे वयाच्या ८३ व्या वर्षी निधन झाले आहे. त्यांच्या निधनाची बातमी समोर आल्यानंतर तेलुगू इंडस्ट्रीवर शोककळा पसरली आहे. राव यांनी चार दशकांच्या त्यांच्या सिनेकारकिर्दीत तेलुगू चित्रपट आणि रंगभूमीवर काम केले आहे.

कोटा श्रीनिवास राव यांची ओळख

दिग्गज तेलुगू अभिनेते आणि आंध्र प्रदेशचे माजी आमदार कोटा श्रीनिवास राव यांचा जन्म 10 जुलै 1942 रोजी आंध्र प्रदेशातील कृष्णा जिल्ह्यातील कंकीपाडू याठिकाणी झाला. 1978 मध्ये ‘प्राणम् खारीदू’ या तेलुगू चित्रपटातून त्यांनी अभिनय क्षेत्रात पदार्पण केले. त्यानंतर तब्बल 750 हून अधिक चित्रपटांमध्ये त्यांनी भूमिका साकारल्या आहेत. ते आपल्या विविधांगी भूमिकांसाठी ओळखले जात होते.

नकारात्मक भूमिकेत 

राव यांनी दाक्षिणात्य चित्रपटांचा पडदा गाजवला. त्यांच्या नकारात्मक भूमिकेमुळे ते ओळखले जात होते. बहुतांशी चित्रपटात त्यांची खलनायकाची भूमिका असल्याने दक्षिणेतील चित्रपटातील खलनायकांच्या यादीत त्यांचा समावेश होता. 2013 मध्ये प्रदर्शित झालेल्या अभिनेता रामचरणच्या ‘नायक’ या चित्रपटाील त्यांची भूमिका प्रचंड गाजली होती. तेलुगूसोबतच त्यांनी तमिळ आणि हिंदी भाषांमध्येही काम केले आहे. बॉलिवूडमधील ‘सरकार’ या चित्रपटात त्यांनी खलनायकाची भूमिका साकारली होती.

मिळालेले पुरस्कार 

राव यांनी सिनेमा क्षेत्रात दिलेल्या योगदानाची दखल आंध्रप्रदेश आणि भारत सरकारने घेतली. आंध्र प्रदेश सरकारच्यावतीने दिल्या जाणाऱ्या आणि अत्यंत प्रतिष्ठेच्या मानल्या जाणाऱ्या नंदी पुरस्कार त्यांनी तब्बल नऊ वेळा पटकावला आहे. 2015 मध्ये भारत सरकारने त्यांना भारतीय चित्रपटसृष्टीतील त्यांच्या महत्त्वपूर्ण योगदानाबद्दल ‘पद्मश्री’ पुरस्कार देऊन सन्मानित केले.

1999 मध्ये राजकारणात प्रवेश 

आंध्र प्रदेशचे मुख्यमंत्री एन. चंद्राबाबू नायडू यांनी राव यांच्या निधनाबद्दल दु:ख व्यक्त केले आहे. राव यांच्या निधनाने तेलुगू सिनेसृष्टीत कधीही भरून न निघणारी पोकळी निर्माण झाल्याचे त्यांनी म्हटले आहे. 1999 मध्ये कोटा श्रीनिवास राव यांनी राजकारणात प्रवेश केला होता. ते 2004 पर्यंत विजयवाडाचे आमदार होते.

हेही वाचा : Muralidhar Mohol : चंद्रकांत पाटलांच्या ‘त्या’ विधानावर मोहोळांनी फडणवीसांसमोरच खास शैलीत दिलं उत्तर, पुण्यातील कार्यक्रमात काय घडलं?