पिंपरी – यंदाचा गणेशोत्सव पिंपरी-चिंचवडकरांसाठी विशेष ठरणार आहे. तब्बल २६ वर्षांनंतर हरतालिका तृतीया आणि श्री गणेश चतुर्थी एकाच दिवशी येत आहेत. सोमवारी, १४ सप्टेंबरला हा दुर्मिळ योग जुळून आला आहे. त्यामुळे यंदाच्या गणेशोत्सवाबाबत नागरिकांमध्ये उत्सुकता वाढली आहे.

यापूर्वी १९९६ आणि २००० मध्ये अशाच प्रकारचा योग आला होता. तिथीच्या गणनेमुळे यंदाचा गणेशोत्सव १० किंवा ११ दिवसांचा राहणार नाही. यंदा गणेशोत्सव तब्बल १२ दिवस साजरा होणार आहे. गुरुवारी, २५ सप्टेंबरला अनंत चतुर्दशीच्या दिवशी गणेशमूर्तींचे विसर्जन होईल.

हरतालिका तृतीया आणि गणेश चतुर्थीच्या पूजेच्या वेळेबाबत सध्या संभ्रम निर्माण झाला आहे. सोशल मीडियावरही विविध संदेश फिरत आहेत. त्यामुळे नागरिकांमध्ये गैरसमज वाढत आहेत. मात्र, पंचांग अभ्यासकांनी याबाबत स्पष्ट माहिती दिली आहे.

पंचांगानुसार तृतीया तिथी १३ सप्टेंबरला सकाळी ७ वाजून ८ मिनिटांनी सुरू होईल. १४ सप्टेंबरला सकाळी ७ वाजून ६ मिनिटांनी तृतीया संपेल. हरतालिका पूजनासाठी सूर्योदयाच्या वेळी तृतीया तिथी असणे महत्त्वाचे मानले जाते. तर गणेशाची प्राणप्रतिष्ठा मध्यान्ह काळातील चतुर्थी तिथीत केली जाते.

त्यामुळे दोन्ही पूजांमध्ये कोणताही अडथळा नाही. हरतालिका पूजनासाठी सकाळी ७.०६ पूर्वीच पूजा पूर्ण करावी, असा कोणताही कठोर नियम नाही. पूजेचे साहित्य तत्काळ विसर्जित केल्यानंतरच गणेशस्थापना करावी, हा दावा देखील चुकीचा आहे.

महिलांनी कोणतेही दडपण न घेता दिवसभरात हरतालिका पूजन करावे. त्यानंतर मध्यान्ह काळात घरात श्री गणरायाची विधिवत स्थापना करावी, असे पंचांग अभ्यासकांनी स्पष्ट केले आहे. गणेश चतुर्थीच्या काळात घरात सुतक किंवा अशौच असल्यास त्या वर्षी गणेशस्थापना करू नये, असेही धर्मशास्त्रात नमूद असल्याचे अभ्यासकांनी सांगितले.

Ganesh Naik :‘बाहेर काढलेली भुतं परत बंद करण्याची ताकद असेल…’; गणेश नाईकांची एकनाथ शिंदेंवर अप्रत्यक्ष टीका