Kunickaa Sadanand : बॉलिवूड आणि टेलिव्हिजन विश्वातील ज्येष्ठ अभिनेत्री कुनिका सदानंद (Kunickaa Sadanand) यांच्या मातोश्री कल्याणी सदानंद यांचे निधन झाले आहे. त्या ८३ वर्षांच्या होत्या. गोव्यात त्यांनी अखेरचा श्वास घेतला. आईच्या निधनाची दुःखद बातमी कुनिका यांनी सोशल मीडियावर पोस्ट शेअर करत चाहत्यांसोबत दिली.

आईच्या आठवणींना उजाळा देताना कुनिका यांनी एक भावनिक पोस्ट लिहिली आहे. आयुष्यातील प्रत्येक टप्प्यावर आईने दिलेले प्रेम, मार्गदर्शन आणि आव्हानांचा सामना करण्याचे बळ यासाठी त्यांनी आईचे आभार मानले. तसेच स्वप्न पाहण्याची आणि ती पूर्ण करण्यासाठी जगाशी दोन हात करण्याची प्रेरणाही आईकडूनच मिळाल्याचे त्यांनी सांगितले.

कुनिका यांनी आपल्या पोस्टमध्ये लिहिले, “माझी प्रिय आई, माझे तुझ्यावर खूप प्रेम आहे. तू मला दिलेल्या प्रत्येक गोष्टीबद्दल धन्यवाद. प्रेम, मार्गदर्शन, स्वप्न पाहण्याचे आणि जगाला सामोरे जाण्याचे धैर्य, तुझे सौंदर्य आणि व्यक्तिमत्त्व, तसेच आयुष्यातील आव्हानांना सामोरे जाण्याचे बळ तू मला दिलेस.”

पुढे त्यांनी आईच्या स्वभावाचे वर्णन करताना त्या मनमिळाऊ, आनंदी आणि उत्साही व्यक्ती असल्याचे म्हटले. आयुष्यात पत्नी, आई, बहीण, आजी अशा विविध भूमिका त्यांनी प्रेम आणि काळजीपूर्वक पार पाडल्या, असेही कुनिका यांनी नमूद केले. “आई, तुझ्या आत्म्यास शांती लाभो,” अशा भावुक शब्दांत त्यांनी आपल्या भावना व्यक्त केल्या.

 

View this post on Instagram

 

A post shared by Kunickaa Sadanand (@iam_kunickaasadanand)

कुनिका सदानंद यांनी हिंदी चित्रपटसृष्टीसोबतच छोट्या पडद्यावरही आपल्या अभिनयाची वेगळी छाप पाडली. ‘खलनायक’, ‘मुझे कुछ कहना है’, ‘फॅशन’, ‘गोलमाल रिटर्न्स’ आणि ‘मेरे ब्रदर की दुल्हन’ यांसारख्या चित्रपटांमध्ये त्यांनी काम केले आहे.

टेलिव्हिजन क्षेत्रातही कुनिका हे परिचित नाव आहे. ‘कहानी घर घर की’, ‘कुसुम’, ‘कुमकुम’, ‘बिदाई’ आणि ‘कभी आये ना जुदाई’ यांसारख्या लोकप्रिय मालिकांमध्ये त्यांनी भूमिका साकारल्या आहेत. तसेच ‘बिग बॉस १९’ या रिअॅलिटी शोमध्येही त्या सहभागी झाल्या होत्या.

कुनिका यांच्या आईच्या निधनाची बातमी समोर आल्यानंतर चाहत्यांसह मनोरंजन विश्वातील अनेकांनी सोशल मीडियावर शोक व्यक्त करत कल्याणी सदानंद यांना श्रद्धांजली अर्पण केली आहे.

Pimpri-Chinchwad: चासकमानही हातातून जाणार? स्थानिकांचा पिंपरी-चिंचवडला पाणी देण्यास विरोध