Jackie Shroff : २६ वर्षांपूर्वीची आठवण! जॅकी श्राफ यांनी शेअर केली खास पोस्ट
Jackie Shroff : या व्हिडिओसोबत जॅकी यांनी 'कहीं प्यार ना हो जाये'च्या प्रदर्शनाला २६ वर्षे पूर्ण झाल्याचे कॅप्शन दिले.

Jackie Shroff : बॉलिवूडमधील रोमँटिक कॉमेडी चित्रपट ‘कहीं प्यार ना हो जाये’ ला प्रदर्शित होऊन २६ वर्षे पूर्ण झाली आहेत. २००० मध्ये प्रदर्शित झालेल्या या चित्रपटात सलमान खान, राणी मुखर्जी, रविना टंडन आणि जॅकी श्रॉफ यांच्या प्रमुख भूमिका होत्या.
या चित्रपटाच्या आठवणींना अभिनेता जॅकी श्रॉफ यांनी उजाळा दिला आहे. अभिनेत्याने आपल्या इन्स्टाग्राम स्टोरीवर चित्रपटातील संपूर्ण कलाकारांचा एक खास व्हिडिओ शेअर केला आहे.
या व्हिडिओसोबत जॅकी यांनी ‘कहीं प्यार ना हो जाये’च्या प्रदर्शनाला २६ वर्षे पूर्ण झाल्याचे कॅप्शन दिले. या पोस्टवरुन नेटकऱ्यांनी आपल्या प्रतिक्रिया व्यक्त करत व्हिडिओ लाईक केले आहे.
‘द वेडिंग सिंगर’ चित्रपटाचा रिमेक
के. मुरली मोहन राव यांनी या चित्रपटाचे दिग्दर्शन केले होते, तर नरेंद्र बजाज यांनी निर्मितीची जबाबदारी सांभाळली होती. हा चित्रपट हॉलिवूडच्या ‘द वेडिंग सिंगर’ या चित्रपटाचा रिमेक होता.
‘कहीं प्यार ना हो जाये’ या चित्रपटातील गाणी प्रचंड हिट झाली होती. चित्रपटातील शीर्षकावरील गाणे अत्यंत लोकप्रिय ठरले होते. चित्रपटातील गाण्यांना हिमेश रेशमिया यांनी संगीत दिले होते.
सलमान-रविना यांची शेवटची ऑनस्क्रीन जोडी
या चित्रपटात सलमान खान, राणी मुखर्जी, रविना टंडन, जॅकी श्रॉफ, मोहनीश बहल आणि काश्मिरा शाह यांनी महत्त्वाच्या भूमिका साकारल्या होत्या. सलमान खान आणि रविना टंडन यांचा एकत्र आलेला हा तिसरा आणि शेवटचा चित्रपट होता.
काय होती चित्रपटाची कथा?
या चित्रपटाची कथा प्रेम (सलमान खान) या गायकाभोवती फिरते. प्रेम लग्नसमारंभ आणि छोट्या-मोठ्या कार्यक्रमांमध्ये गाणी गाऊन आपला उदरनिर्वाह करत असतो. याचदरम्यान तो निशाच्या (रविना टंडन) प्रेमात पडतो. दोघांचे लग्नही ठरते. मात्र, लग्नाच्या दिवशी निशा अचानक येत नाही. ती आपल्या आजारी भावाची काळजी घेण्यासाठी एका श्रीमंत अमेरिकन व्यक्तीशी लग्न करण्याचा निर्णय घेतल्याचे प्रेमला सांगते.
निशाच्या या निर्णयामुळे प्रेम पूर्णपणे खचून जातो आणि दारूच्या आहारी जातो. अशातच त्याच्या आयुष्यात प्रियाची (राणी मुखर्जी) एन्ट्री होते. हळूहळू प्रिया प्रेमच्या आयुष्यात आनंद परत आणते आणि त्याचे आयुष्य बदलू लागते. अशा प्रकारे प्रेम, विश्वासघात आणि नव्या नात्यांची गोष्ट या चित्रपटातून सुरेख मांडणी करण्यात आली होती.
चित्रपट बॉक्स ऑफिसवर ठरला फ्लॉप
१७ नोव्हेंबर २००० रोजी प्रदर्शित झालेल्या या चित्रपटाला प्रेक्षकांकडून अपेक्षित प्रतिसाद मिळाला नाही. दमदार कलाकार आणि लोकप्रिय संगीत असूनही हा चित्रपट बॉक्स ऑफिसवर अपयशी ठरला. चित्रपटाला आपला निर्मिती खर्चही वसूल करता आला नाही असे सांगितले जाते.
Ramya Krishnan: ‘बाहुबली’ फेम अभिनेत्रीने घटस्फोटांच्या चर्चांवर सोडलं मौन





