Box office release : येत्या १५ आणि १६ ऑक्टोबरला चित्रपटप्रेमींसाठी बॅाक्स अॅाफिसवर मनोरंजनाची मेजवानी असणार आहे. कोर्टरूम ड्रामा, हॉरर, ऐतिहासिक कथा आणि दमदार ॲक्शन अशा विविध जॉनरचे चित्रपट एकाच दिवशी प्रदर्शित होणार आहेत. त्यामुळे या स्पर्धेत प्रेक्षकांची पसंती कोणत्या चित्रपटाला मिळणार, याकडे सर्वांचे लक्ष लागले आहे.

‘स्ट्रीट फायटर’मधून विद्युत जामवालची हॉलिवूडमध्ये एन्ट्री

दमदार ॲक्शन आणि मार्शल आर्ट्स कौशल्यासाठी ओळखला जाणारा अभिनेता विद्युत जामवाल ‘स्ट्रीट फायटर’ या चित्रपटातून हॉलिवूडमध्ये पदार्पण करत आहे. या चित्रपटात तो मार्शल आर्ट्स मास्टर धल्सिमची भूमिका साकारत आहे. विद्युतच्या ॲक्शन कौशल्यामुळे या चित्रपटाबद्दल चाहत्यांमध्ये उत्सुकता आहे. हॉलिवूडच्या ॲक्शनपटांची आवड असलेल्या प्रेक्षकांसाठी हा चित्रपट आकर्षण ठरू शकतो.

‘प्रहार’मध्ये राजकुमार राव साकारणार उज्ज्वल निकम

राजकुमार रावचा ‘प्रहार’ हा कोर्टरूम ड्रामा चित्रपट आहे. या चित्रपटात तो प्रसिद्ध सरकारी वकील उज्ज्वल निकम यांची भूमिका साकारताना दिसणार आहे. अजमल कसाबला फाशीची शिक्षा मिळवून देण्यासाठी झालेल्या कायदेशीर लढ्याचे चित्रण या चित्रपटात आहे. वेगवेगळ्या व्यक्तिरेखांना आपल्या अभिनयातून वेगळा आयाम देणाऱ्या राजकुमार रावची ही भूमिका कशी असेल, याबद्दल प्रेक्षकांमध्ये उत्सुकता निर्माण झाली आहे.

‘नयी नवेली’मधून यामी गौतम भयपटाच्या दुनियेत

अभिनेत्री यामी गौतम ‘नयी नवेली’ या चित्रपटातून भयपटाच्या विश्वात प्रेक्षकांसमोर भेटीला येणार आहे. या चित्रपटात ती नववधूची भूमिका साकारत असून, कथेमध्ये गूढ घटना, भीती आणि अनपेक्षित वळणांचा समावेश असल्याचे सांगितले जाते. विविध प्रकारच्या भूमिका साकारलेल्या यामीचा या नव्या जॉनरमधील अभिनय प्रेक्षकांना किती भावतो, हे पाहणे औत्सुक्याचे ठरणार आहे.

‘राणाबली’मध्ये विजय देवरकोंडा-रश्मिका मंदानाची जोडी

विजय देवरकोंडाचा ‘राणाबली’ हा ऐतिहासिक पार्श्वभूमीवर आधारित असलेला चित्रपट आहे. १९व्या शतकातील ब्रिटिश राजवटीच्या काळातील संघर्ष आणि अन्यायाविरोधात उभ्या राहिलेल्या योद्ध्याची कथा यात पाहायला मिळणार आहे. या चित्रपटाचे आणखी एक आकर्षण म्हणजे विजय देवरकोंडा आणि रश्मिका मंदाना ही जोडी. दोघे पुन्हा एकदा एकत्र मोठ्या पडद्यावर दिसणार असल्याने त्यांच्या चाहत्यांमध्ये उत्सुकता आहे.

‘जेलर २’मधून रजनीकांत यांचा दमदार स्वॅग

सुपरस्टार रजनीकांत यांच्या चित्रपटांची चाहत्यांमध्ये नेहमीच मोठी क्रेझ पाहायला मिळते. ‘जेलर २’ या बहुचर्चित चित्रपटात ते पुन्हा मुथुवेल पांडियन अर्थात ‘टायगर’च्या भूमिकेत दिसणार झळकणार आहेत. हा चित्रपट १५ ऑक्टोबर रोजी प्रदर्शित होणार आहे. रजनीकांत यांचा स्टारडम आणि पडद्यावरील दमदार स्वॅग त्यांच्या चाहत्यांच्या भेटीला येत आहे.

बॉक्स ऑफिसवर कोण ठरणार प्रेक्षकांची पहिली पसंती?

वेगवेगळ्या विषयांवर आधारित हे चित्रपट बॉक्स ऑफिसवर आपापले स्थान निर्माण करण्याचा प्रयत्न करतील. ‘प्रहार’मधील कोर्टरूम ड्रामा, ‘नयी नवेली’मधील भय आणि रहस्य, ‘राणाबली’मधील ऐतिहासिक संघर्ष, ‘स्ट्रीट फायटर’मधील ॲक्शन आणि ‘जेलर २’मधील रजनीकांत यांचा स्वॅग यामुळे चित्रपटप्रेमींसाठी ही पर्वणी ठरू शकते.

मात्र, बॉक्स ऑफिसवरील यश केवळ कलाकारांच्या लोकप्रियतेवर ठरत नाही. चित्रपटाला मिळणाऱ्या स्क्रीन्स, आगाऊ तिकीट बुकिंग, प्रेक्षकांच्या प्रतिक्रिया आणि समीक्षकांची मते यांचाही महत्त्वाचा वाटा असतो. त्यामुळे प्रदर्शनानंतर कोणता चित्रपट प्रेक्षकांची मने जिंकतो आणि कमाईच्या बाबतीत बाजी मारतो, हे पाहणे महत्त्वाचे ठरणार आहे.

Jantar Mantar protest: तिरंगा फडकवणं गुन्हा आहे का? ; सौरव दास आणि रांकाच्या कोठडीवरून अभिजीत दिपकेंचा सवाल!