पुणे : पुणे महानगरपालिका निवडणुकीच्या पार्श्वभूमीवर राष्ट्रवादी काँग्रेसच्या अजित पवार गट आणि शरद पवार गट यांच्यातील प्रस्तावित युतीची चर्चा काल (२६ डिसेंबर) फिस्कटली आहे. जागावाटप आणि निवडणूक चिन्हावरून निर्माण झालेल्या मतभेदांमुळे ही आघाडी होऊ शकली नाही. अजित पवार गटाने शरद पवार गटाला अवघ्या ३० ते ३५ जागा देण्याचा प्रस्ताव ठेवला होता, तसेच घड्याळ चिन्हावर लढण्याची अट घातली होती. हा प्रस्ताव शरद पवार गटाला मान्य झाला नाही. परिणामी, दोन्ही गट एकत्र लढणार नाहीत, अशी स्पष्ट माहिती राष्ट्रवादी काँग्रेस (शरद पवार गट) चे नेते अंकुश काकडे यांनी दिली आहे. आम्ही महाविकास आघाडीतूनच निवडणूक लढणार आहोत, असं त्यांनी स्पष्ट केलं. दुसरीकडे, पुणे महापालिकेत भाजप-शिवसेना (शिंदे गट) युतीच्या चर्चेदरम्यान राष्ट्रवादी अजित पवार गट आणि शिंदे शिवसेना यांच्यातील संभाव्य नवीन आघाडीवरही चर्चा सुरू झाली होती. शिवसेनेचे रवींद्र धंगेकर यांनी याबाबत सकारात्मक प्रतिक्रिया दिली होती. ते म्हणाले, प्रत्येक पक्षाच्या कार्यकर्त्यांना मान-सन्मान मिळाला पाहिजे. कार्यकर्त्यांच्या भावनांचा विचार करून निर्णय घेतला पाहिजे. अशा युतीमुळे कार्यकर्त्यांना न्याय मिळत नसेल तर ती घातक ठरू शकते. धंगेकर यांनी भाजपकडून मिळालेल्या जागावाटपाच्या प्रस्तावाला नाकारले असून, भाजपने ऑफर केलेल्या जागा आम्हाला मान्य नाहीत, त्या जागांवर आम्ही किंवा शिवसेना कधी निवडून आलो नाही, असं ते म्हणाले. त्यांनी एकनाथ शिंदे आणि उदय सामंत यांची भेट घेतली असून, कार्यकर्त्यांच्या भावना लक्षात घेऊन निर्णय घेण्यावर भर दिला. शिवसेना (शिंदे गट) च्या कार्यकर्त्यांच्या आक्रमकतेवर बोलताना धंगेकर म्हणाले, काल आमच्या कार्यकर्त्यांच्या भावनांचा उद्रेक झाला. प्रत्येक पक्षाच्या कार्यकर्त्यांना सन्मान मिळाला पाहिजे, असं ते म्हणाले. सध्या पुणे महापालिका निवडणुकीत बहुपक्षीय लढत पाहायला मिळणार असून, महाविकास आघाडी (काँग्रेस, शिवसेना-उद्धव गट, राष्ट्रवादी-शरद गट) आणि महायुती (भाजप, शिवसेना-शिंदे, राष्ट्रवादी-अजित) यांच्यात तगडी स्पर्धा होण्याची शक्यता आहे. मात्र, राष्ट्रवादीच्या दोन्ही गटांची वेगळी लढत आणि शिंदे शिवसेना-राष्ट्रवादी अजित पवार गट युतीची शक्यता यामुळे चित्र अधिक गुंतागुंतीचे झाले आहे.
