Raj Thackeray : राज्यातील महानगरपालिका निवडणुकीच्या तोंडावर राजकीय पक्षांतरांना वेग आला आहे. मनसेला ऐन वेळी मोठा धक्का बसला असून, दोन प्रमुख नेत्यांसह अनेक कार्यकर्त्यांनी एकनाथ शिंदे यांच्या शिवसेनामध्ये प्रवेश केला आहे. यामुळे मनसेत खळबळ उडाली असून, शिंदे गटाची ताकद वाढली आहे. मनसेचे राज्य सचिव आणि भारतीय मराठा महासंघाचे राष्ट्रीय सरचिटणीस राजन गावंड यांनी आज उपमुख्यमंत्री एकनाथ शिंदे यांच्या प्रमुख उपस्थितीत शिवसेनेत जाहीर प्रवेश केला. त्यांच्यासोबत भारतीय मराठा महासंघाचे राष्ट्रीय उपाध्यक्ष अशोक पाटील, राष्ट्रीय कोषाध्यक्ष राम शिंदे, जनसंपर्क प्रमुख राज ठाकूर, मनसेचे जिल्हा सचिव ॲड. शैलेंद्र करले, भिवंडी मनसे विभाग अध्यक्ष श्रीनाथ भैरी, अनिल पवार, राजू प्रेस्थान तसेच ठाणे जिल्हा प्रकल्पग्रस्त हितकारी कृती समितीचे जिल्हा सचिव कुणाल पाटील, जिल्हा उपाध्यक्ष श्रीराम पाटील, यश शिंदे, हनुमंत भुरके आणि मानवता सेवा संघाचे पदाधिकारी शिव वाघेरा, प्रतीक्षा वाघेरा, प्रियांका वाघेरा, हर्षल वाघेरा, अनिता जाधव, सरिता चारु, प्रतिभा चित्ते, शरद शिंदे यांनीही भगवा झेंडा हाती घेत पक्षप्रवेश केला. एकनाथ शिंदे यांनी सर्वांचे पक्षात स्वागत करत शुभेच्छा दिल्या. यावेळी शिवसेना प्रवक्ते राहुल लोंढे, शिवसेना पदाधिकारी आणि शिवसैनिक उपस्थित होते. हा प्रवेश ठाणे आणि आसपासच्या भागात मनसेच्या संघटनेवर मोठा फटका मानला जात आहे. परेश तेलंग यांचाही शिवसेनेत प्रवेश मुंबईतही मनसेला धक्का बसला आहे. महाराष्ट्र नवनिर्माण केबल सेनेचे अध्यक्ष आणि प्रभाग क्रमांक २१७ मधील इच्छुक उमेदवार परेश तेलंग यांनी उपमुख्यमंत्री एकनाथ शिंदे यांच्या उपस्थितीत शिवसेनेत अधिकृत प्रवेश केला. मनसेकडून तिकीट नाकारल्याने तेलंग यांनी हा निर्णय घेतला असून, आगामी मुंबई महापालिका निवडणुकीत याचा फटका मनसेला बसण्याची शक्यता आहे. हे प्रवेश ऐन निवडणुकीच्या तोंडावर राज ठाकरे यांच्या मनसेला मोठा धक्का देत असून, शिंदे गट महायुतीसोबत मजबूत होत आहे. मनसे आणि शिवसेना (उद्धव ठाकरे गट) यांची काही ठिकाणी युती असली तरी, हे पक्षांतर राजकीय समीकरणे बदलण्याचे संकेत देत आहेत.
