पुणे : वाढत्या भौतिकवादाच्या आणि स्वार्थाच्या युगात प्रामाणिकपणा दुर्मिळ होत चालल्याची चर्चा होत असताना, एरंडवणे परिसरात घडलेल्या एका घटनेने माणुसकी आणि प्रामाणिकपणाचा सुंदर प्रत्यय दिला आहे. रस्त्यात हरवलेले अंदाजे १४ ग्रॅम वजनाचे सोन्याचे मंगळसूत्र एका सजग नागरिकाने प्रामाणिकपणे परत करत समाजासमोर आदर्श निर्माण केला आहे. या घटनेमुळे संबंधित महिलेच्या कुटुंबीयांनी सुटकेचा निश्वास टाकला असून सर्व स्तरांतून त्या व्यक्तीचे कौतुक होत आहे.

मिळालेल्या माहितीनुसार, मागील आठवड्यात एस हॉस्पिटल परिसरातील रस्त्यावर एका महिला रुग्णाचे अंदाजे १४ ग्रॅम वजनाचे सोन्याचे मंगळसूत्र हरवले होते. दागिना हरवल्याचे लक्षात येताच संबंधित महिला घाबरलेल्या अवस्थेत हॉस्पिटलमध्ये पोहोचल्या आणि त्यांनी कर्मचाऱ्यांना घडलेला प्रकार सांगितला.

घटनेचे गांभीर्य ओळखून हॉस्पिटल प्रशासन आणि कर्मचाऱ्यांनी तात्काळ हालचाली सुरू केल्या. त्या दिवशी हॉस्पिटलमध्ये आलेले रुग्ण, त्यांच्या नातेवाईकांसह विविध व्हिजिटर्स यांच्याकडे चौकशी करण्यात आली. तसेच परिसरातही माहिती घेण्याचा प्रयत्न सुरू होता.

दरम्यान, त्या दिवशी हॉस्पिटलमध्ये कामानिमित्त आलेले मेडिकल रिप्रेझेंटेटिव्ह गणेश वाघमारे यांना रस्त्यावर येताना हे सोन्याचे मंगळसूत्र सापडले होते. त्यांनी ते स्वतःकडे सुरक्षित ठेवले होते. हॉस्पिटलमध्ये हरवलेल्या मंगळसूत्राबाबत चौकशी सुरू असल्याची माहिती त्यांना त्यांचे मित्र अजय कापसे यांच्याकडून समजली. त्यानंतर त्यांनी तात्काळ हॉस्पिटल प्रशासनाशी संपर्क साधून संबंधित दागिना सुरक्षित असल्याची माहिती दिली.

यानंतर हॉस्पिटल प्रशासनाने संबंधित महिला रुग्णाच्या पतीला बोलावून घेतले. सर्वांची खात्री करून आणि आवश्यक पडताळणी पूर्ण झाल्यानंतर सोन्याचे मंगळसूत्र संबंधित कुटुंबीयांकडे सुखरूप सुपूर्द करण्यात आले. हरवलेला मौल्यवान दागिना परत मिळाल्याने कुटुंबीयांच्या डोळ्यांत आनंदाश्रू तरळले.
प्रामाणिकपणाचे सर्वत्र कौतुक

सोन्याचे दर गगनाला भिडलेले असताना लाखो रुपयांचा दागिना स्वतःहून परत करणाऱ्या गणेश वाघमारे यांच्या प्रामाणिकपणाचे सर्व स्तरांतून कौतुक होत आहे. तसेच रुग्णाच्या अडचणीला संवेदनशीलतेने प्रतिसाद देणाऱ्या एस हॉस्पिटलच्या कर्मचाऱ्यांचेही नागरिकांकडून अभिनंदन करण्यात येत आहे.

या घटनेमुळे आजही समाजात माणुसकी, विश्वास आणि प्रामाणिकपणा जिवंत असल्याचा सकारात्मक संदेश मिळत असल्याची भावना नागरिकांनी व्यक्त केली.

हेही वाचा : Pinarayi Vijayan: मुख्यमंत्रीपद जाताच ED चा मोठा दणका ; केरळच्या माजी मुख्यमंत्री अन् त्यांच्या मुलीच्या घरांवर छापेमारी