प्रभात वृत्तसेवा नारायणगाव – लाला अर्बन बँकेस ‘ग्रीन वर्ल्ड को प्राईड 2025’ पुरस्काराने सन्मानित करण्यात आले असल्याची माहिती बँकेचे अध्यक्ष युवराज बाणखेले यांनी दिली. सन 2024-2025 या आर्थिक वर्षात कर्ज वितरणामध्ये उल्लेखनीय कामगिरी केल्याबद्दल हा पुरस्कार ग्रीन वर्ल्ड पब्लिकेशन व कॉसमॉस बँक यांच्या संयुक्त विद्यमाने आयोजित ‘सहकार मंथन 2025’ कार्यक्रमात पुणे येथे प्रदान करण्यात आला. हा पुरस्कार महाराष्ट्र राज्याचे सहकार मंत्री बाबासाहेब पाटील यांच्या हस्ते देण्यात आला.लाला अर्बन बँकेने कर्ज वितरण करताना लघु, सूक्ष्म व मध्यम उद्योजक, तसेच विविध उद्यमशील व्यक्तींना भांडवल उपलब्ध करून देत त्यांच्या व्यवसायवृद्धीस व उत्पन्न वाढीस महत्त्वपूर्ण योगदान दिले आहे. यासोबतच कर्ज पोर्टफोलिओचे सुयोग्य नियोजन, सक्षम व्यवस्थापन धोरण, आर्थिक पारदर्शकता, सभासदांना नियमित लाभांश वितरण तसेच रिझर्व्ह बँकेच्या वैधानिक मार्गदर्शक तत्त्वांचे काटेकोर पालन केल्यामुळे बँकेने समाजात विश्वासार्हता निर्माण केली आहे. याच सर्व बाबींच्या आधारे लाला अर्बन बँकेस हा प्रतिष्ठेचा पुरस्कार मिळाल्याचे अध्यक्ष युवराज बाणखेले यांनी सांगितले. बँकेच्या वतीने उपाध्यक्ष जितेंद्र गुंजाळ, संचालक नितीन लोणारी व संदीप लेंडे यांनी पुरस्कार स्वीकारला. 936 कोटींचा एकूण व्यवसाय सध्या लाला अर्बन बँकेच्या 573 कोटी रुपयांच्या ठेवी व 363 कोटी रुपयांचे कर्ज वाटप असा एकूण 936 कोटी रुपयांचा मिश्र व्यावसाय असून बँक आर्थिकदृष्ट्या सक्षम व सुस्थितीत व्यवस्थापन कॅटेगिरीत कार्यरत आहे. तसेच बँकेची मोबाईल बँकिंग सेवा कार्यान्वित असल्याने ग्राहकांना आधुनिक व सुलभ बँकिंग सुविधा उपलब्ध होत आहेत.
