Pune District : न्हावरेत आजपासून सामाजिक सलोख्याचे दर्शन
Pune District : तीन दिवसांच्या उत्सवात धार्मिक परंपरेला मनोरंजनाची जोड मिळणार आहे. शनिवारी सकाळी भैरवनाथ महाराजांचा महाभिषेक आणि विधिवत पूजा होणार आहे.

न्हावरे : ग्रामदैवतावरील अढळ श्रद्धा, वर्षानुवर्षे जपली गेलेली परंपरा आणि हिंदू-मुस्लीम ऐक्याचा वारसा… अशा वैशिष्ट्यांनी ओळखल्या जाणाऱ्या न्हावरे (ता. शिरूर) येथील भैरवनाथ महाराज आणि पीर चांदशाहवली बाबा यांचा संयुक्त यात्रा उत्सव शनिवार (दि. २१) पासून सोमवार (दि. २३) पर्यंत आयोजित केला आहे. गावात यात्रेचा उत्साह पाहायला मिळणार असून, विविध कार्यक्रमांसाठी ग्रामस्थांकडून जोरदार तयारी करण्यात आली आहे.
तीन दिवसांच्या उत्सवात धार्मिक परंपरेला मनोरंजनाची जोड मिळणार आहे. शनिवारी सकाळी भैरवनाथ महाराजांचा महाभिषेक आणि विधिवत पूजा होणार आहे. सायंकाळी शेरणी वाटप, दंडवताचा कार्यक्रम झाल्यानंतर रात्री नऊ वाजता मानाचा सोहळा रंगणार आहे. भैरवनाथ महाराजांचा छबिना, पीर चांदशाहवली बाबांचा संदल एकत्रितपणे काढण्यात येणार आहे. रोषणाई, शोभेचे दारूकाम आणि आतषबाजीमुळे मिरवणुकीला विशेष रंगत येणार आहे.
रविवारी तमाशा आणि कुस्तीप्रेमींसाठी पर्वणी असणार आहे. सकाळी पद्मश्री रघुवीर खेडकर आणि कांताबाई सातारकर यांच्या तमाशाची हजेरी होणार आहे. दुपारी तीन वाजता मैदानात जंगी कुस्त्यांचा आखाडा भरणार आहे. रात्री पुन्हा लोकनाट्य तमाशाचा कार्यक्रम आहे. सोमवारी यात्रेच्या शेवटच्या दिवशी महिलांसाठी पारंपरिक शिळ्या बाजाराचे आयोजन केले आहे. कोल्हापूरच्या ‘धमाका ऑर्केस्ट्रा’च्या संगीत आणि सांस्कृतिक कार्यक्रमाने यात्रेची रंगत आणखी वाढणार आहे.
सामाजिक एकोप्याचा संदेश
यावेळी न्हावरे गावातील मंदिर परिसर, बाजारपेठ विद्युत रोषणाईने सजविली आहे. न्हावरेची ही यात्रा केवळ धार्मिक उत्सव नसून, दोन धर्मांच्या श्रद्धास्थानांना जोडणारी आणि सामाजिक एकोप्याचा संदेश देणारी परंपरा आहे. पिढ्यान्पिढ्या जपल्या जाणाऱ्या या उत्सवातून गावच्या सांस्कृतिक वैभवाचे दर्शन घडणार आहे. या यात्रेचा लाभ घेण्यासाठी परिसरातील नागरिकांनी मोठ्या संख्येने उपस्थित राहावे, असे आवाहन यात्रा कमिटीने केले आहे.





