मुंबई: नव्या वर्षाच्या स्वागताची तयारी सुरू असतानाच, मुंबईतून एक खळबळजनक घटना समोर आली आहे. शिवसेना (उद्धव बाळासाहेब ठाकरे) पक्षाचे नेते आणि खासदार संजय राऊत यांच्या भांडुपमधील निवासस्थानाबाहेर उभ्या असलेल्या एका गाडीवर अज्ञात व्यक्तीने बॉम्बस्फोटाची धमकी दिल्याने परिसरात प्रचंड खळबळ उडाली आहे. “आज रात्री १२ वाजता ब्लास्ट होईल,” असा मजकूर गाडीवर लिहिलेला आढळला. नेमकं प्रकरण काय? मिळालेल्या माहितीनुसार, मुंबईतील भांडुप पश्चिम परिसरात संजय राऊत यांचे निवासस्थान आहे. बुधवारी त्यांच्या घराबाहेर उभ्या असलेल्या एका चारचाकी गाडीवर अज्ञात इसमाने धमकीचा संदेश लिहिला. या संदेशात बुधवारी मध्यरात्री १२ वाजता स्फोट घडवून आणण्याची धमकी देण्यात आली होती. हा प्रकार निदर्शनास येताच परिसरात भीतीचे वातावरण पसरले आणि तातडीने पोलिसांना पाचारण करण्यात आले. पोलीस आणि ‘बीडीडीएस’कडून तपास घटनेची माहिती मिळताच मुंबई पोलिसांनी घटनास्थळी धाव घेतली. परिस्थितीचे गांभीर्य ओळखून बॉम्ब शोधक आणि नाशक पथकालाही (BDDS) पाचारण करण्यात आले. पथकाने राऊतांच्या घराबाहेर आणि संपूर्ण परिसराची कसून तपासणी केली. मात्र, प्राथमिक तपासात पोलिसांना कोणतीही संशयास्पद वस्तू किंवा स्फोटके आढळली नाहीत. ‘हॉक्स’ मेसेज असल्याची शक्यता वरिष्ठ पोलीस अधिकाऱ्यांनी दिलेल्या माहितीनुसार, प्राथमिक दृष्ट्या हा केवळ भीती पसरवण्याच्या उद्देशाने दिलेला खोटा संदेश (Hoax Message) असावा असा संशय आहे. तरीही, सुरक्षेच्या कारणास्तव याकडे दुर्लक्ष केले जात नसून, पोलिसांनी परिसरातील सीसीटीव्ही फुटेज तपासण्यास सुरुवात केली आहे. “हा खोडसाळपणा आहे की गंभीर धमकी, याचा तपास सुरू आहे. अफवांवर विश्वास ठेवू नका, पोलीस सतर्क आहेत,” असे प्रशासनाकडून सांगण्यात आले आहे. या प्रकरणी पोलीस आता हे शोधत आहेत की, भररस्त्यात गाडीवर असा संदेश लिहिणारा इसम नेमका कोण आहे.
