पिंपरी – दिवाळीचा आनंद केवळ आपल्या घरापुरता मर्यादित न ठेवता दुष्काळाच्या झळा सोसणाऱ्या शेतकरी कुटुंबांच्या आयुष्यातही आनंदाचे रंग भरण्याचा संवेदनशील उपक्रम कष्टकरी संघर्ष महासंघ, मानवतावादी जनशक्ती आणि मानव सेवा चॅरिटेबल ट्रस्ट यांच्या वतीने राबविण्यात आला.

‘माणुसकीची दिवाळी’ या उपक्रमांतर्गत लातूर जिल्ह्यातील औसा तालुक्यातील मासुर्डी गावासह धाराशिव जिल्ह्यातील दुष्काळग्रस्त शेतकऱ्यांच्या बांधावर जाऊन त्यांच्यासोबत दिवाळी साजरी करण्यात आली. अन्नधान्य, दिवाळी फराळ आणि नवीन कपड्यांच्या वाटपातून शेतकरी कुटुंबांच्या चेहऱ्यावर आनंद फुलविण्याचा प्रयत्न करण्यात आला.

दुष्काळामुळे आर्थिक संकटाचा सामना करणाऱ्या शेतकरी कुटुंबांना सणासुदीच्या काळात आधार देण्याच्या उद्देशाने हा उपक्रम राबविण्यात आला. मदत वाटपाबरोबरच शेतकरी कुटुंबांशी संवाद साधून त्यांच्या अडचणी जाणून घेण्यात आल्या. संकटाच्या काळात आपण एकटे नसून संपूर्ण कष्टकरी समाज आपल्या पाठीशी आहे, हा विश्वास देण्याचा प्रयत्न यावेळी करण्यात आला.

मानव सेवा चॅरिटेबल ट्रस्टचे अध्यक्ष महेश स्वामी, कामगार नेते तथा कष्टकरी संघर्ष महासंघाचे अध्यक्ष काशिनाथ नखाते, तंटामुक्त गाव समितीचे अध्यक्ष रमेश पिंपरे, मनपा समिती सदस्य किरण साडेकर, उपाध्यक्ष राजेश माने, चंद्रकांत कुंभार, लाला राठोड, विशाल सरोदे, सुनील भोसले, समशुद्दीन शेख आदी या उपक्रमात सहभागी झाले होते.

गावकऱ्यांनी या उपक्रमात सहभागी झालेल्या पदाधिकाऱ्यांचे आपुलकीने स्वागत केले. त्यांच्या नाश्ता आणि जेवणाची व्यवस्था केली. गावकऱ्यांच्या प्रेमळ आदरातिथ्यामुळे पदाधिकारी भारावून गेले.

Crowd of passengers: रेल्वे, बसस्थानकांवर उसळली प्रवाशांची गर्दी