बारामती : तीव्र पोटदुखीने त्रस्त झालेल्या ५० वर्षीय ज्येष्ठ महिलेच्या पोटात गर्भाशयाच्या पिशवीलाच ४.२ किलोची मांसल गाठ आढळली. मात्र, बारामतीच्या डाॅक्टरांनी अचूक निदान करीत तत्परतेने निर्णय घेत शस्त्रक्रिया यशस्वी केली. त्यामुळे महिलेच्या जीवावरील धोका टळला आहे. बारामती शहरातील मेहता मेडीकेअर मल्टीस्पेशलिटी हॉस्पिटलचे प्रमुख डाॅ. विशाल मेहता यांनी ही गुंतागुंतीची अवघड शस्त्रक्रिया यशस्वीरित्या पूर्ण करीत मांसल गाठ बाहेर काढली. गुंतागुंतीच्या शस्त्रक्रियेद्वारे ४.२ किलो वजनाची गाठ यशस्वीरीत्या काढून ५० वर्षीय महिलेला नवजीवन दिले. ज्येष्ठ महिला काही दिवसांपासून तीव्र पोटदुखी, सतत जडपणा, हालचाली करताना वेदना जाणवणे, लघवीस अडथळा होणे या लक्षणांनी त्रस्त होत्या. दैनंदिन कामकाजात त्यांना मोठा त्रास जाणवत असल्याने त्या हैराण होत्या. त्यांच्या कुटुंबीयांनी महिलेचा त्रास पाहून स्थानिक डाॅक्टरांनी केलेल्या सोनोग्राफीत पिशवीला मोठ्या आकाराची गाठ असल्याचे दिसले. नातेवाईकांच्या सल्ल्यानुसार रुग्णाला बारामतीजवळील एका तालुक्याच्या ठिकाणी दाखल केले. मात्र, शस्त्रक्रिया सुरू करताच गाठ मोठी व गुंतागुंतीची असल्याचे लक्षात आले. सुसज्ज आयसीयू व तज्ज्ञ पोस्ट-ऑपरेटिव्ह व्यवस्थापनाशिवाय हे ऑपरेशन धोकादायक ठरू शकते, असे सांगून पुढील उपचारासाठी रुग्णाला बारामती येथील मेहता मेडीकेअर मल्टीस्पेशलिटी हॉस्पिटलमध्ये पाठविले. यावेळी डाॅ. मेहता यांनी केलेल्या तपासणीत ती गाठ पूर्णपणे वेडीवाकडी वाढलेली असून ती लघवीची नळी (युरेटर), मूत्राशय, आतडे (इंटेस्टाइन) व आजूबाजूच्या महत्त्वाच्या अवयवांना घट्ट चिकटल्याचे दिसले. त्यामुळे रुग्णाची संपूर्ण शारीरिक यंत्रणा विस्कळीत झाली होती. परिणामी रोजचे साधे कामसुद्धा वेदनादायक झाले होते. क्लिष्ट परिस्थितीत डॉ. मेहता यांनी २१ वर्षांच्या वैद्यकीय अनुभवाच्या जोरावर ४ तास चाललेली गुंतागुंतीची शस्त्रक्रिया यशस्वीपणे पार पाडली. शस्त्रक्रियेत ४.२ किलो वजनाची गाठ सुरक्षितपणे काढली. शस्त्रक्रियेसाठी डॉ. विशाल मेहता, डॉ. निकिता मेहता, डॉ. पुष्पदंत रूगे, मेहता मेडीकेअर मल्टीस्पेशलिटी हॉस्पिटलच्या संपूर्ण वैद्यकीय व नर्सिंग टीमने संयम, कौशल्य, समन्वयाने काम केले. त्यांच्या अथक परिश्रमामुळे रुग्णाला जीवदान मिळाले. शस्त्रक्रियेनंतर अत्याधुनिक आयसीयू, प्रभावी पोस्ट-ऑपरेटिव्ह मॅनेजमेंट, डेडिकेटेड पेशंट केअर यामुळे रुग्णाची प्रकृती लवकर स्थिर झाली. सध्या रुग्णाची तब्येत सुधारत असून ती डॉक्टरांच्या देखरेखीखाली आहे. बदलती जीवनशैली, प्रदूषण कारणीभूत डॉ. विशाल मेहता यांनी सांगितले की, गाठी महिलांमध्ये आढळण्याचे प्रमाण वाढले आहे. बदलती जीवनशैली, प्रदूषण, अयोग्य आहार घेण्याचे प्रमाण वाढल्याने महिलांमध्ये अशा प्रकारचे त्रास जाणवत आहेत. यामध्ये वयाची कोणतीही मर्यादा नाही. तरुण मुलींमध्ये देखील हा त्रास जाणवु शकतो. मासिक पाळीच्या काळात पोट दुखणे, सातत्याने खालच्या पाठीत आणि ओटीपोटात दुखणे ही लक्षणे असू शकतात. मात्र, वेळेवर लक्ष न दिल्यास याचे रुपांतर कर्करोगात होण्याचा धोका आहे. त्यासाठी वेळोवेळी मुली आणि महिलांनी वेळोवेळी आरोग्य तपासणी, सोनोग्राफी करुन घ्यावी, असे आवाहन डाॅ. मेहता यांनी केले.
