बेंगळुरू: कन्नड आणि तमिळ मनोरंजन सृष्टीवर सध्या शोककळा पसरली आहे. लोकप्रिय अभिनेत्री नंदिनी सीएम (वय २६) हिने बेंगळुरू येथील आपल्या राहत्या घरी गळफास लावून आत्महत्या केली. राहत्या घरात संशयास्पद परिस्थितीत तिचा मृतदेह आढळून आला. आत्महत्येपूर्वी तिने एक सविस्तर सुसाईड नोट लिहिली असून, त्यामध्ये तिने आपल्या कुटुंबावर गंभीर आरोप केले आहेत. या घटनेमुळे टेलिव्हिजन इंडस्ट्रीमध्ये मोठी खळबळ उडाली आहे. नेमकी घटना काय? नंदिनी बेंगळुरूच्या केंगेरी परिसरातील एका पेइंग गेस्ट (PG) निवासात राहत होती. २९ डिसेंबर २०२५ रोजी पहाटेच्या सुमारास तिने गळफास लावून आपले जीवन संपवले. माहिती मिळताच केंगेरी पोलिसांनी घटनास्थळी धाव घेतली. पोलिसांना तिथे नंदिनीच्या हस्ताक्षरातील एक चिठ्ठी सापडली आहे, ज्यामध्ये तिने आपल्या मनातील वेदना व्यक्त केल्या आहेत. सुसाईड नोटमधील खळबळजनक दावे: नंदिनीने तिच्या मृत्यूसाठी कुटुंबाकडून येणारा मानसिक दबाव कारणीभूत असल्याचे म्हटले आहे. सुसाईड नोटनुसार, घरच्यांकडून तिच्यावर लग्नासाठी सतत दबाव टाकला जात होता, मात्र ती त्यासाठी तयार नव्हती. वडिलांच्या निधनानंतर तिला अनुकंपा तत्त्वावर सरकारी नोकरीची संधी मिळाली होती. मात्र, अभिनयाची आवड असल्याने तिने ती नोकरी नाकारली. या निर्णयावरून घरात तीव्र मतभेद होते. कौटुंबिक कलह आणि इतर वैयक्तिक कारणांमुळे ती दीर्घकाळापासून ‘डिप्रेशन’मध्ये होती. अभिनय क्षेत्रातील कारकीर्द: मूळची बेल्लारीची असलेल्या नंदिनीने अभियांत्रिकीचे शिक्षण सोडून ग्लॅमर विश्वात पाऊल ठेवले होते. तिने ‘जीवा हूवागिदे’, ‘संघर्ष’ आणि ‘गौरी’ यांसारख्या प्रसिद्ध मालिकांमध्ये महत्त्वाच्या भूमिका साकारल्या होत्या. २०१९ मध्ये अभिनय प्रशिक्षण पूर्ण केल्यानंतर तिने अल्पावधीतच कन्नड आणि तमिळ प्रेक्षकांच्या मनात स्थान निर्माण केले होते. सध्या पोलिसांनी मृत्यूची नोंद केली असून, नंदिनीचा मृतदेह शवविच्छेदनासाठी पाठवण्यात आला आहे. पोलीस आता तिचे मित्र आणि नातेवाईकांचे जबाब नोंदवून अधिक तपास करत आहेत.
