Satara:  सातारा शहराचा पर्यटनात्मक विकास व्हावा, ऐतिहासिक वास्तूंचे संवर्धन व्हावे यासाठी सातत्यपूर्ण प्रयत्न करणार्‍या ना. शिवेंद्रसिंहराजे भोसले यांच्या पाठपुराव्याला आज मोठे यश मिळाले. शिवतीर्थावर (पोवई नाका) येथे छत्रपती शिवरायांचा 25 फूट उंचीचा पुतळा उभारण्यासाठी तसेच शिवतीर्थ परिसर विकसित करण्यासाठी पाच कोटी 75 लाख रुपये निधी मंजूर करण्यात आला. विशेष म्हणजे ना. शिवेंद्रसिंहराजेंच्या मागणीवरून उपमुख्यमंत्री तथा नगर विकास मंत्री एकनाथ शिंदे यांनी 24 तासांच्या आत निधीला मंजुरी दिली.

निधी उपलब्ध करून दिल्याबद्दल ना. शिवेंद्रसिंहराजे यांनी मुख्यमंत्री देवेंद्र फडणवीस, ना. एकनाथ शिंदे आणि ना. सुनेत्रा पवार यांचे आभार मानले आहेत. शहराचा विकासात्मक कायापालट सुरु असून ऐतिहासिक आणि महत्वाचे ठिकाण असलेल्या शिवतीर्थ परिसराचे सुशोभिकरण करण्याचे काम युद्धपातळीवर सुरु आहे. याठिकाणी छत्रपती शिवाजी महाराजांचा 25 फूट उंचीचा नवीन पुतळा उभारण्यात यावा, तसेच याठिकाणी पुतळाविषयक अनुज्ञेय विकासकामे करण्यासाठी भरीव निधी उपलब्ध व्हावा, यासाठी राज्याचे सार्वजनिक बांधकाम मंत्री शिवेंद्रसिंहराजे भोसले यांचा पाठपुरावा सुरु होता. ना. शिवेंद्रसिंहराजे यांच्या सूचनेनुसार तसा परिपूर्ण प्रस्ताव नगरपालिकेने नगर विकास विभागाकडे पाठवला होता. दरम्यान, काल गुरुवार दि. 12 रोजी उपमुख्यमंत्री तथा नगर विकासमंत्री एकनाथ शिंदे त्यांच्या दरे (जि. सातारा) गावी मुक्कामी होते. हे समजल्यानंतर ना. शिवेंद्रसिंहराजे हे सायंकाळी सातार्‍यातून तातडीने दरे गावी रवाना झाले. दरे येथे ना. शिंदे यांच्या निवासस्थानी जाऊन ना. शिवेंद्रसिंहराजेंनी त्यांची भेट घेतली. यावेळी नगराध्यक्ष अमोल मोहिते, नगरसेवक अविनाश कदम, फिरोज पठाण आदी उपस्थित होते.

ना. शिवेंद्रसिंहराजे यांनी शिवतीर्थावर छत्रपती शिवरायांचा 25 फुटी पुतळा तसेच त्यासाठीचा 15 फुटांचा चबुतरा उभारणी व या अनुषंगाने आवश्यक कामे प्रलंबित असल्याचे सांगून हे काम लवकरात लवकर मार्गी लावण्यासाठी नगर विकास विभागाकडून त्वरित निधी उपलब्ध करून द्यावा, अशी मागणी ना. शिंदे यांच्याकडे केली. ना. शिंदे यांनी तात्काळ मंत्रालयातील अधिकार्‍यांना दूरध्वनी करून निधी उपलब्ध करून देण्याच्या सूचना केल्या. ना. शिवेंद्रसिंहराजे यांची मागणी गांभीर्याने घेऊन ना. शिंदे यांनी या कामाला हिरवा कंदील दाखवला होता. नगर विकास विभागाने आज शुक्रवार दि. 13 रोजी सकाळीच ‘नगरपरिषदांना वैशिष्ट्यपूर्ण कामासाठी विशेष अनुदान’ या योजनेतून’ या कामासाठी 5 कोटी 75 लाख रुपये निधी उपलब्ध करून दिला. ना. शिवेंद्रसिंहराजेंनी मागणी केल्यानंतर 24 तासांच्या आत ना. शिंदे यांनी हा निधी मंजूर केल्याने शिवतीर्थावर शिवपुतळा उभारण्याचा मार्ग मोकळा झाला आहे.

आहे तसाच हुबेहुब पुतळा उभारणार…

दरम्यान, शिवतीर्थ येथे सध्या तोफेवर हात ठेवलेला शिवपुतळा आहे. हुबेहूब तसाच नवीन 25 फूट उंचीचा पुतळा उभारण्यात येणार आहे. हा नवीन पुतळा ख्यातनाम शिल्पकार राम सुतार यांचे सुपुत्र अनिल सुतार यांनी साकारला आहे. चबुतर्‍याची उंची 15 फूट आणि 25 फूट पुतळा अशी एकूण 40 फूट उंची असलेला छत्रपती शिवाजी महाराजांचा पुतळा शहराच्या सौंदर्यात अधिक भर टाकेल, असे ना. शिवेंद्रसिंहराजे यांनी स्पष्ट केले.