मुंबई: महाराष्ट्र शासनाने आज पाच वरिष्ठ आयएएस अधिकाऱ्यांच्या बदल्यांचे आदेश जारी केले असून, यामध्ये काही महत्त्वाच्या प्रशासकीय जबाबदाऱ्यांमध्ये बदल करण्यात आले आहेत.

यानुसार, २००५ बॅचचे आयएएस अधिकारी तुकाराम मुंढे, जे सध्या मुंबई येथे असंघटित कामगार विकास आयुक्त म्हणून कार्यरत होते, यांची मंत्रालय, मुंबई येथे दिव्यांग कल्याण विभागाचे सचिव म्हणून नियुक्ती करण्यात आली आहे.

तसेच २००७ बॅचचे आयएएस अधिकारी नितीन काशिनाथ पाटील यांची महाराष्ट्र राज्य कापूस उत्पादक विपणन महासंघ, मुंबई येथील व्यवस्थापकीय संचालक पदावरून विशेष आयुक्त, राज्य कर, महाराष्ट्र, मुंबई येथे बदली करण्यात आली आहे.

त्याचवेळी, अभय महाजन, जे सध्या विशेष आयुक्त, राज्य कर, महाराष्ट्र, मुंबई येथे कार्यरत होते, त्यांना महाराष्ट्र राज्य कापूस उत्पादक विपणन महासंघ, मुंबई येथे व्यवस्थापकीय संचालक म्हणून नियुक्त करण्यात आले आहे.

याशिवाय, २०२२ बॅचचे आयएएस अधिकारी ओमकार पवार, जे इगतपुरी उपविभाग, नाशिक येथे सहाय्यक जिल्हाधिकारी म्हणून कार्यरत होते, त्यांची नाशिक जिल्हा परिषदेचे मुख्य कार्यकारी अधिकारी म्हणून नियुक्ती झाली आहे.

तर, आशा अफझल खान पठाण, ज्या सध्या नागपूर येथे मुख्यमंत्री सचिवालयात सहसचिव म्हणून कार्यरत होत्या, त्यांना वनामती (VANAMATI), नागपूर येथे महासंचालक म्हणून नियुक्ती देण्यात आली आहे. यासोबतच त्यांच्याकडे मुख्यमंत्री सचिवालयाच्या सहसचिवपदाचा अतिरिक्त कार्यभारही राहणार आहे. या बदल्यांचे आदेश आज, ५ ऑगस्ट २०२५ रोजी जारी करण्यात आले आहे.