Share Market Crash | भारतीय शेअर बाजारात मागील काही दिवसांपासून सातत्याने घसरण सुरू आहे. जानेवारी 2025 पासूनच बाजारात पडझड सुरू असून, यामुळे गुंतवणूकदारांचे कोट्यावधी रुपयांचे नुकसान झाले आहे. 28 फेब्रुवारीला एकाच दिवसात सेन्सेक्स तब्बल 1400 अंकांनी खाली आला. तर निफ्टीमध्ये 418 अंकांची घसरण दिसून आली. या घसरणीमुळे गुंतवणूकदारांचे जवळपास 8.82 लाख कोटी रुपयांचे नुकसान झाले.

मात्र, भारतीय बाजारात याआधीही अशाप्रकारची घसरण दिसून आली आहे. याआधी भारतीय शेअर बाजार कोणत्या घटनांमुळे कोसळला होता, त्याविषयी जाणून घेऊयात.

हर्षद मेहता घोटाळा (1992)

हा भारतीय शेअर बाजारातील सर्वात मोठा घोटाळा म्हणून ओळखला जातो. हर्षद मेहताने बनावट फंड्सचा वापर करून स्टॉकच्या किंमती वाढवल्या होत्या. मात्र, हा घोटाळा उघड झाल्यानंतर सेन्सेक्स सर्वोच्च पातळीवरून तब्बल 56 टक्के खाली आला होता. सेन्सेक्स एप्रिल 1992 मध्ये 4,467 वरून एप्रिल 1993 मध्ये 1,980 पर्यंत खाली आला होता. या घोटाळ्यामुळे अनेक गुंतवणूकदारांचे कोट्यावधी रुपयांचे नुकसान झाले.

आशियातील आर्थिक संकट (1997)

1997 च्या काळात आशियातील अनेक देशांना आर्थिक संकटाचा सामना करावा लागला. स्थानिक चलनाचे मुल्य घसरल्याने दक्षिण-पूर्व आशियातील अनेक देशांना फटका बसला होता. याचा परिणाम भारतीय बाजारावरही दिसून आला. डिसेंबर 1997 मध्ये सेन्सेक्स 28 टक्क्यांनी घसरून 4,600 वरून 3,300 अंकांपर्यंत खाली आला होता.

निवडणूक निकाल (2004)

2004 च्या निवडणुकीआधी पुन्हा एनडीएचे सरकार सत्तेत येणार अशी शक्यता होती. मात्र, यूपीए आघाडीला अनपेक्षित यश मिळाल्यानंतर याचा परिणाम बाजारावर दिसून आला. एका दिवसातच सेन्सेक्समध्ये तब्बल 15 टक्क्यांची घट दिसून आली. गुंतवणूकदारांनी एवढी प्रचंड विक्री केली की अखेर ट्रेडिंग थांबवण्याचा निर्णय घेण्यात आला. बाजाराला सावरण्यासाठी जवळपास 1 महिना लागला.

2008 चे आर्थिक संकट

अमेरिकेत लेहमन ब्रदर्स ही कंपनी दिवाळखोर झाल्यानंतर जागतिक बाजारावर मंदीचे सावट निर्माण झाले. यामुळे जगभरात मोठे आर्थिक संकट निर्माण झाले होते. भारतासह जगभरातील शेअर बाजार कोसळले. सेन्समध्ये अवघ्या 10 महिन्यातच तब्बल 60 टक्के घसरण दिसून आली होती. जानेवारी 2008 ला सेन्सेक्स 21,200 अंकांवर व्यवहार करत होता. मात्र, या संकटानंतर ऑक्टोबर 2008 मध्ये घसरून 8,160 अंकांवर आला.

कोव्हिड-19 आणि लॉकडाउन (2020)

कोव्हिड-19 महामारी आणि त्यापाठोपाठ लागू करण्यात आलेल्या लॉकडाऊनमुळे जगभरातील शेअर बाजार कोसळल्याचे दिसून आले. अवघ्या 2 महिन्यातच सेन्सेक्स 39 टक्क्यांनी खाली आला होता. 2020 च्या जानेवारीमध्ये सेन्सेक्स 42,273 अंकांवर होता, तो मार्च 2020 मध्ये 25,650 अंकांवर आला. यातून सावरण्यासाठी शेअर बाजाराला अनेक महिने लागले.