सातारा – सातारा जिल्हा हा राष्ट्रवादी काँग्रेस शरदचंद्र पवार पक्षाचा बालेकिल्ला कायम राहावा, यासाठी पक्षाच्यावतीने जोरदार मोर्चेबांधणी करण्यात येत आहे. आगामी विधानसभा निवडणुकीसाठी जिल्ह्यातील सात मतदारसंघांमध्ये 30 दिग्गजांनी पक्षाकडे उमेदवारीची मागणी केली आहे. राष्ट्रवादीतील फुटीनंतरही जिल्ह्यात शरद पवार यांच्याकडे दिग्गजांची फौज दिसून येत आहे.

सातारा जिल्हा हा नेहमीच राष्ट्रवादी काँग्रेसचा बालेकिल्ला राहिला आहे. राष्ट्रवादीचे अध्यक्ष शरद पवार यांनी जिल्ह्यातील प्रत्येक मतदारसंघात आपली ताकद वाढवण्याचा प्रयत्न नेहमीच केला आहे. अजित पवार यांनी राष्ट्रवादीतून बाहेर पडण्याचा निर्णय घेतल्यानंतरही, शरद पवार यांनी पक्षाला गळती लागू न देता, पक्षाची ताकद वाढवण्याचा प्रयत्न केला आहे. काही महिन्यांपूर्वी झालेल्या लोकसभा निवडणुकीत ही ताकद दिसून आली. आगामी विधानसभा निवडणुकीसाठी शरद पवार, प्रदेशाध्यक्ष आ. जयंत पाटील, खा. सुप्रिया सुळे, आ. रोहित पवार यांनी जिल्ह्यातील मतदारसंघांमध्ये भेटीगाठींचा सिलसिला सुरू ठेवला आहे.

आगामी विधानसभा निवडणूक महाविकास आघाडीच्या माध्यमातून लढवण्यात येणार असून, सातारा जिल्ह्यातील आठपैकी जास्तीत जास्त जागा मिळवण्याचा राष्ट्रवादी काँग्रेसचा प्रयत्न राहणार आहे. जिल्ह्यातील सात मतदारसंघांमधील 30 इच्छुकांनी पक्षाकडे उमेदवारीची मागणी केली आहे. फलटण मतदारसंघातून सर्वाधिक 13 अर्ज आले असून, त्यामध्ये राजेंद्र भाऊ पाटोळे, अभय धोंडीराम वाघमारे, लक्ष्मण बाबुराव माने, अमोल गुलाब आवळे, दिगंबर रोहिदास आगवणे, वैभव शंकर पवार, रमेश तुकाराम आढाव, बुवासाहेब पंडित हुंबरे, डॉ. राजेंद्र विष्णू काकडे, प्रा. डॉ. बाळासाहेब शंकरराव कांबळे, प्रा. डॉ. अनिल सीताराम जगताप, धनश्याम राजाराम सरगर, बापूसाहेब तुकाराम जगताप यांचा समावेश आहे.

वाई मतदारसंघातून दत्तात्रय सर्जेराव ढमाळ, अनिल बुवासाहेब जगताप, डॉ. नितीन उत्तमराव सावंत, रमेश धायगुडे-पाटील, कैलास सदाशिव जमदाडे, यशराज मोहन भोसले, नीलेश लक्ष्मण डेरे, कोरेगावमधून आ. शशिकांत शिंदे, माणमधून प्रभाकर घार्गे, अभयसिंह खाशेराव जगताप, अनिल शिवाजीराव देसाई, कराड उत्तरमधून आ. बाळासाहेब पाटील, पाटणमधून सत्यजित विक्रमसिंह पाटणकर, सातारा-जावळीमधून शफीक कासम शेख, दीपक साहेबराव पवार या दिग्गजांनी पक्षाकडे उमेदवारीची मागणी केली आहे.
दरम्यान, शरद पवार हे रविवारी (दि. 22) जिल्हा दौर्‍यावर असून, त्यावेळी नाट्यमय घडामोडी होण्याची शक्यता आहे. राष्ट्रवादी काँग्रेस शरदचंद्र पवार पक्षाकडे इच्छुकांनी मोठ्या प्रमाणात उमेदवारीची मागणी केल्याने, पदाधिकारी व कार्यकर्त्यांमध्ये नवचैतन्य निर्माण झाले आहे.