पिंपरी :  मालमत्ता सर्वेक्षणात आकारणी न झालेल्या सद्यस्थितीत 2,51,165 इतक्या नवीन मालमत्ता आढळून आल्या आहेत. त्यापैकी 2,03,894 मालमत्तेची मोजणी पूर्ण झाली असून त्यावर कर आकारणी कार्यवाही सुरु आहे. सर्वेक्षणात आढळून आलेल्या मालमत्तापैकी 1,13,831 मालमत्ताधारकांना आतापर्यंत मालमत्ता कर आकारणीसाठी कागदपत्रांची पूर्तता करण्यासाठी नोटीस, एसएमएस यामाध्यमातून कळविण्यात आले आहे.

ही कागदपत्रे मालमत्तेस अद्यावत व बिनचूक नाव लावण्यासाठी व विशेष दिनांकापासुन आकारणी करण्यासाठी आवश्यक आहेत. अद्यापपर्यंत ज्या मालमत्ताधारकांनी कागदपत्रे सादर केलेली नाहीत अशा मालमत्ताधारकांना पुन्हा कागदपत्र मागणीपत्राची अंतिम नोटीस बजाविण्याची कार्यवाही सुरु आहे. कागदपत्रे मागणीची नोटीस समक्ष तसेच मालमत्ता बंद असल्यास मालमत्तेच्या दर्शनीभागावर लावून बजावणी करण्यात येत आहे. तरी मालमत्तेच्या नोंदणी व आकारणीसाठी आवश्यक असलेली पुढील कागदपत्रे संबंधित करसंकलन कार्यालयात पूर्तता करणे गरजेचे आहे.

पिंपरी-चिंचवड महापालिकेच्या कर आकारणी व कर संकलन विभागामार्फत आकारणी न झालेल्या मालमत्तांचे नोंदणी व करआकारणी कार्यवाही करण्यासाठी मे. स्थापत्य कन्सल्टंट प्रा.लि या खासगी कंपनीची नेमणूक करण्यात आली असून त्यांच्यामार्फत शहरातील मालमत्तांचे सर्वंकष सर्वेक्षण सुरू आहे.

चौकट या कागदपत्रांची पूर्तता करण्यासाठी नोटीस
1) इमारत/जमीन/फ्लॅटची मालकी हक्काची कागदपत्रे, खरेदीखत किंवा इंडेक्स, सातबारा उतारा, मिळकतपत्रिका
2) एमआयडीसी/प्राधिकरण/पुणे गृहनिर्माण व क्षेत्र विकास मंडळ यांच्याकडील मालमत्ता असल्यास रजिस्टर अग्रीमेंट, दस्त व संबधित संस्थेने निर्गमित केलेले ताबा पत्राची सत्य प्रत.
3) मिळकतीबाबत नोंदणीकृत बक्षीसपत्र/वाटणीपत्र झाले असल्यास त्याची सत्य प्रत.
4) इमारत बांधकाम परवानगी प्राप्त असल्यास मंजूर बांधकाम पूर्णत्वाचा दाखला व मंजूर नकाशाची प्रत, या कागदपत्रांची संबंधित मालमत्ताधारकांनी पुर्तता करणे अत्यंत आवश्यक आहे.

सहा वर्षे मागे जाऊन मालमत्ताकराची आकारणी
नोटीस बजावूनही पूर्तता न केल्यास मालमत्ताधारकांस याबाबत कोणतेही स्वारस्य नाही असे समजण्यात येईल. महाराष्ट्र महानगरपालिका अधिनियमातील कलम 150 (अ) मधील तरतूदीनुसार सहा वर्षे मागे जाऊन मालमत्ताकराची आकारणी केली जाईल. त्यामुळे ज्या मालमत्ताधारकांना मालकी हक्काचे व बांधकाम पूर्णत्वाचे कागदपत्राचे पूर्तता करण्यासाठी मे. स्थापत्य कन्सल्टंट प्रा.लि याएजन्सीमार्फत नोटीस बजाविण्यात येत असून या कागदपत्रांची पुर्तता करावी, असे आवाहन करसंकलन विभागाद्वारे करण्यात आले आहे.

मालमत्ता करआकारणीसाठी आवश्यक कागदपत्रे सात दिवसांमध्ये विभागीय करसंकलन कार्यालयामध्ये जमा करावीत. मालमत्ताधारकांना बजाविण्यात आलेल्या नोटीसवर देण्यात आलेल्या पत्त्यावर पोस्टाद्वारे किंवा नमूद केलेल्या ई-मेलद्वारेही कागदपत्रांची पूर्तता करण्याची सोय उपलब्ध करुन देण्यात आली असून मालमत्ताधारकांनी तत्काळ संबंधित विभागाकडे कागदपत्रांची पुर्तता करावी. योग्य आकारणीसाठी नागरिकांनी या संधीचा उपयोग करुन घेणे आवश्यक आहे. नोटीस बजावूनही कागदपत्रे सादर न केल्यास आणि अयोग्य आकारणी झाल्यास त्याची जबाबदारी महापालिकेची राहणार नाही.

– अविनाश शिंदे,
सहाय्यक आयुक्त, कर आकरणी व कर संकलन विभाग,